Hpakant De Hpyen N-gun Htu Lung Wa Ai Myen Hpyen Hpung Ni Hpe Lawnghkang Maga Na Hpyen Hpung Ni Yu Tau Nga
Namya kaw na Myen Hpyen la ni Tung Fung Mawdaw 4 the lung wa ai hpe sa tau la na matu, Lay Pyin ( Sha It Yang) kaw Myen Hpyen n-gun 200 ram mahkawng na, Namya de na lung wa ai hpyen hpung ni hpe sa tau na matu hkyen shajin taw nga ai lam, KIA the ni nawn ai Salang langai KNG Shiga de tsun shana wa ai re.
Dai hpawt manap jau hkying 7 aten daram hta, Namya kaw du nga ai hpyen hpung ni, Hpakant de Tungfung Mawdaw 4 hpring hkra Hpakant de lung wa ai hpe sa tau la na matu, Lawnghkang Lay Pyin kaw hpyen n-gun 200 mahkawng nna, Namya lam de yu wa ai nga, KIA the ni nawn ai Salang langai tsun ai re.
Dai ni ya ten du hkra gaw lam lapran gap gasat hkat ai lam n nga ai rai tim, Myen hpyen ni Sengtawng Gwihka hpe gasat zing na matu hpyen n-gun ding yang jat bang taw nga ai re lam, shawng lam hpyen magam gun the ni nawn ai ni kaw na chye lu ai.
Myen Hpyen ni mung shawa hking hking nna, hpyen n gun grai jat lung wa ai majaw, KIA maga Hpakant lam hpe gan pat kau ai lam re hpe sagawn chye lu ai.
Ndai laman Myen hpyen ni Hpakant ginra kata hpyen shamu shamawt ai lam ding yang galaw nga nna, dai hpawt manap jau kaw na San Chyoi Gawdin pa shawng kaw Mung shawa yawng hpe Masha jep, Phone jep ai lam ni galaw taw nga ai lam chye lu ai.
Lawnghkang Sky Hotel kaw Myen ni rawng nga ai hpe, KIA PDF dap maga, mana laknak kaba sa gap bun ya ai lam nga wa ai hpe chye lu ai.
Laknak kaba sa gap bun ai majaw, masha si hkala ai lam nga n nga hpe gaw a tsawm n chye lu ai rai tim, Hotel dum n ta the wang chyinghka ni hten ma ai hpe chye lu ai.
Hpakant ginra n dai laman Myen Hpyen dap the Pyithutsit ni hpyen shamu shamawt ai lam ding yang galaw nga ai majaw, Majan kaba matut byin wa na masa nga ai lam, hpyen masa yu maram ai ni tsun da ai re.
