Hpakant Uru Ginwang KIA Dap Dung 6 shara de Myen Hpyen dap Y12 Nbungli hte dai hpawt manap Bawm 36 lang wa jahkrat bun kau da ai lam, KIA the ni nawn ai ni tsun ai re.
Dai Hpawt October 21 ya jahpawt hkying 7:30 aten daram hta Myitkyina na lung wa ai Y12 Nbungli langai gaw, Kamaing Ginsi hku gayin pyen shang wa nna, KIA Dung 6 Hpyen Rangrut dabang makau grup yin kaw bawm 36 lang wa jahkrat bun kau da ai lam KIA hte ni nawn ai Hpakant Ginra masha langai KNG shiga dap de n dai zawn tsun dan wa ai re.
“Dai hpawt Ginsi de bawm wa jahkrat ai Y12 nbungli gaw Kamaing lai di Ginsi maga hku pru wa rai di na Dung 6 kaw hkying hkum mi wa pyen gayen na, Bawm 36 lang jahkrat kau da ai da. Dai ni gaw Ningpawt Ninghpang Hpyen Rangrut hpang ai n htoi rai nga ai, dai majaw rai na re,” nga tsun dan ai re.
Bawm wa jahkrat bun ai hta, Si hkala ai lam n nga ai nga, KIA the ni nawn ai nit sun ai rai tim, Hkra machyi ai lam the seng nna, a tsawm tup hkrak n chye lu ai re.
Hpakant ginra hta lai wa sai Shata ni hkan kaw na, atit anang hpyen rim lahkawn woi la da ai ni hpe dai ni kaw na Hpyen Rangrut hpang ai shani hta nbungli bawm wa jahkrat bun ai mung rai nga ai.
Hpakant ginra hta ndai laman Myen HPyen dap ni htu da ai hpyen n gun nkau hpe baw shaw la kau ai hpang majan masa lam ni loi gan zim taw ai rai tim, Mani kaw na Yuma mare makau grup yin ni hta laknak kaba hte bai gap gasat hkat taw nga ai rai nga ai.
Mana hkying 9 aten daram hta, Hpakant Myen Hpyen Tatma kawng na gap ai laknak kaba si Yuma mare Lungseng rung shawng kaw wa hkrat ai lam chye lu ai.
Dai grup yin na mung shawa yawng hprawng yen mat sai majaw, masha hka hkala ai lam gaw hpa n nga ai rai tim, dum n ta loi li hkra hten ai lam matut chye lu ai re.
Mana gaw, Hpakant Sut Bum na Myen Hpyen la marai 30 ram gaw, Rahkaing kung maga de sa wa ai hpe bawm hkap gap bun ai hta, sum machyi law wa ai majaw, Mashikahtawng Rahkaing kung kaw shana tup gap gasat hkat wa ai lam chye lu ai re.