Lahta Sammung ginra Tipaw Muklum hpe Myen hpyen dap htim gasat zing madu kau ngut ai hpang, TNLA Uphkang ginra de Nbungli the shani shagu bawm sa jahkrat bun taw nga nna, Mogok maga de bai htim gasat wa na masa byin taw ai lam, ginra masha ni tsun ai re.
October 19 ya shani hta mung, Mai Ngaw, Namsan, Mandung, Mogok mare ni de nbungli bawm sa jahkrat bun kau da ai lam chye lu ai.
Myen Hpyen Nbungli bawm jahkrat bun ai majaw, Makam Masham htingnu htingsang kaba ni, Wansat rung, Hpalap jak rung the Mung shawa dum n ta, U lawng zawn re ai lam ni hkra hten taw nna, mung shawa marai 2 mung hkala hkrum wa ai lam ginra masha langai KNG de n dai zawn tsun dan wa ai re.
“ Ya Myen Hpyen dap ni gaw, lai was ai 2024 ning 1027 majan masing ten laman TNLA ni zing da ai ginra yawng hpe bai jaw na matu tsun ai le, dai hpe TNLA maga na Masha kaba ni n hkap la ai majaw, ya gaw shan hte htim gasat na mare ni de nbungli bawm hkan jahkrat bun taw ai ga rai nga ai,” nga tsun dan ai re.
Myen Hpyen dap ni n dai laman bawm wa jahkrat bun taw ai shara law malawng gaw, Masha htat ai shara ni hpe hkrai lata nna, hkan jahkrat bun taw ai majaw, Balawng TNLA uphkang ai ginra law malawng na Hpaji jawng, Gat ni yawng hpe Hpyen masa hta hkan na gan pat da ai lam, ginra masha ni kaw na matut chye lu ai.
Myen Hpyen dap n bungli bawm hkan jahkrat bun taw ai shara ni law malawng gaw, Mung shawa dum n ta jak rung ni hkrai re lam, Balawng amyu shayi hpung, Ta-ang Women Organization TWO na lit nga ai ni tsun ai re.
“Ndai laman wa hkrat ai shara gaw, Namsan kaw nga yang Hpalap jak rung kaw wa hkrat ai, Mandung kaw gaw Wan sat rung kaw wa hkrat ai, dai hku le shara shagu hkrup mara hkan jahkrat bun taw ai majaw, mung shawa ni gaw gara de hprawng na re n chye myit tsang nah krai nga taw ai,” nga tsun ai re.
October 19 ya shani Myen Hpyen nbungli bawm ai majaw, Namsan ginwang နမ္မဝေါ lawk na mung shawa marai 2 hkala hkrum ai sha n ga, dum n ta lahkawng the Hpalap jak rung, Wan sat mawdaw 5, Mawdaw 4 ni hten za hkrum wa ai lam matut chye lu ai re.
Man Dung အောင်ချမ်းသာ lawk hta mung dum n ta 6 hten za mat nna, မိုင်းငေါ့ လွယ်ပိန်း mare nbungli bawm wa hkrat ai hta, Hpungkyi jawng wang ting la hpa n nga mat hkra hten mat ai lam chye lu ai.
Mogok kaw wa hkrat ai nbungli bawm kaw, Ulawng kaba langai kaw wa hkat ang ai majaw, Ulawng n ta yawng hten ayai mat ai rai nna, masha hkra hkala ai lam gaw, hpa n nga ai lam chye lu ai.
Myen Hpyen dap maga ya na zawn shara shagu nbungli bawm hkan jahkrat bun ai majaw, Mung shawa ni hprawng na shara n mu, yak hkak hkrum taw nga ai lam, Balawng Amyu shayi hpung kaw na tsun da ai re.
Myen Hpyen dap maga lai wa sai September Shata kaw na, Nawng Cho, Kyauk Me, Thi Paw ni hpe bai htim gasat hpang wa ai kaw na, nbungli bawm a majaw mung shawa si hkala hkrum ai marai 40 jan rai sai lam, tsun madi madun da ai re.
