Wunpawng Sha ni a matu English-Kachin-Myanmar Dictionary hte kaga laika law law hpe ka shapraw wa sai, Sara Kaba Rev Manam Hpang, asak (81) ning Gaw Nhtoi July praw 5 ya jahpawt 8:50 aten Madu Yesu hta yup Pyaw mat wa sai re.
Sara Manam Hpang gaw, Wunpawng amyu sha ni a matu English-Kachin-Myanmar Dictionary hte laga ahkyak ai Dictionary hte Laika buk 11 hpe ka shapraw kau da ai wa rai nga ai.
Sara Kaba a lam hte seng nna, shi a kashu Sara Manam Awng Li gaw n dai zawn tsun dan wa ai re.
“Sara Kaba gaw, Jinghpaw Wunpawng amyu sha ni hpe grai tsaw ra ai wa re, grai tsaw ra ai majaw, Amyu sha yawng rawt jat galu kaba wa nna, Laika Hpaji madang tsaw wa ai hte Mungkan lahkam dep sa wa lu na hpe grai myit mada ai wa re. dai majaw gaw shi n dai shawng nnan na Kachin English Myanmar Dictionary ngu ai hpe shi ka shapraw hpang wa ai re,” nga tsun dan ai re.
Sara Manam Hpang gaw,Monyin ginwang hta shangai chyinghkai nna, 1952 Mohnyin Mare Lungja Kawng jawng kaw hpaji sharin hpang wa ai re. 1969 ning hta Mandalay Dakkasu kaw nna B.A(Geography) hte hpaji janmau gup la sai.
Hpaji Jan Mau gup la ngut ai hpang, 1970-1983 ning lapran Myitkyina, Monyin, Mogaung Ginwang ni hta Jawng Sara magam bungli hpe aten na na gun hpai lai wa sai rai nga ai.
Jawng Sara magam bungli kaw na hkring sa ai hpang, 1983 ning hta Gideons International zuphpawng London, Ontario, Canada hte Indianapolis, USA de International zuphpawng ni de mung sa du shang lawm wa sai rai nga ai.
Matut nna mung 1984-86 hta Holy Cross Chyum Kawlik kaw lung nna, 1987-1990 hta Burma Institute of Theol-ogy (ya Myanmar Institute of Theology) Insein kaw M.Div Chyum Hpaji Janmau hpe gup la wa sai re.
Dai hpang 1991 hta Mohnyin Emmanuel Divnity College kaw sharin sara galaw nna 1993 ning hta St.John’s College, Nothingham,England kaw na Dip.M.M janmau hpe matut gup la lu sai.
Dip M.M gup la lu ai hpang 1995-2006 laman Engalican EDC kaw Chyum Jawng-up galaw wa ai hpe chye lu ai.
Sara Kaba Manam Hpang hpe 1995 ning Mandalay kaw galaw ai KBC a Jinghpaw Laika 100 ning hpring Jinghpaw Laika Jaw masat poi kaba hta masat shagrau sha a ai lam ni galaw wa nna, 2008 ning hta galaw ai 60 lang na Jinghpaw Mung Daw Nhtoi Manau poi hta mung, Ja ninggang dazik shagrau hkrum sai re.
Sara Manam Hpang ka kau da ai Wunpawng amyu sha ni a ahkyak dik ai Laika buk ni gaw,
- English – Kachin – Myanmar Dictionary (1977)
- လက်တွေ့ကျကျ ကချင်စကားပြောနည်း (၁၉၈၀)
- ကချင်စကားပြောပုံဇယား(၁၉၈၀)
- မြန်မာကချင် ဝေါဟာရပဒေသာ(၁၉၈၀)
- Gidon la wa mungkan jawt sai (1983)
- A Dictionary of New English (1984)
- Let’s Speak English (1989)
- Kachin English Pocket Detionary (1991)
- English-Kachin-Myanmar Pocket Dictionary-2000 (2nd edition)
- English-Kachin-Myanmar Pocket Dictionary-2012 (3rd edition)
- Kachin-English-Mynmar Dictionary ni Rai nga ai.
Sara kaba Rev. Manam Hpang asak (81) ning a makoi mayang kyuhpyi hpawng lamang hpe July 8 ya shani ka-ang Hkying 12 aten, Myitkyina Dumare Lawk (10) Dum n ta hta akyu hpyi na, Wunpawng Hkristan Lupding Lupra Nawng Nang de makoi mayang sai re.