Putao Lung Sha Yang mare, Lung Sha Hka Hku de Ja htu hkyen ai lam hpe ginra masha ni ja ja ninghkap ai majaw, Wunpawng Mungdan Shanglawt Asuya Ginjaw kaw na, tara shang dai ginra de Ja htu ai lam tsep kawp n galaw na matu pat hkum kau ya sai lam ginra masha ni kaw na chye lu ai.
Dai ginra hta lai wa sai masum ning ram kaw na Ja htu sha ni matu hkyen nga ai shara hpe mung shawa ni ja ja ninghkap ai majaw, Lung Sha Yang mare Komiti salang ni hpe KIA Dapba (1) de shaga la na tsun ahkre ai lam ni mung nga lai wa na, mare komiti salang ni Ginjaw Laiza de sa nna, ninghkap ai lam hpe ginjaw salang ni the sa hkrum ai hpang, ya na zawn jahkring kau ya ai re nga, ginra masha langai KNG de ndai zawn tsun dan wa ai re.
“ Dai kaw Ja htu na matu hkyen taw ai masum ning ram rai sai gaw, Mung shawa ni ja ji ninghkap na gadai lauban mung n gwi htu rai di tawn da ai rai nga ai, Maning mung ninghkap kau ai, Ndai kalang gaw ma ja nan htu hkyen mung shawa ni nkau hpe Dapba de shaga la na nan ahkre ai, dai hpang mung shawa ni Ginjaw de sa rai na, kaba ai ni the sa hkrum ngut ai hpang ya gaw tara shang jahkring ya ai ga rai nga ai” nga tsun ai re.
Lung Sha hka gaw dai ginra mung shawa ni a matu ahkyak dik shara rai nna, lang hka, lu hka, hkau na hka ni yawng dai kaw na sha lang ai majaw, lama ja htu sha kau ai rai yang, hka shi ni yawng hten mat nna, mung shawa ni a matu nga jam jau mat na hpe myit tsang ai majaw, ya na zawn ja ja ninghkap lai wa ai re lam ginra masha ni matut tsun wa ai re.
Dai ginra na mung mare masha ni gaw madung Hkau thing hkau na galaw sha na nga ai mare re majaw, lama dai ginra hta ja htu sha kau ai rai yang, mung shawa ni a galaw lu galaw sha shara ni hpe hkra hten ma na myit tsang nga ai kaw na ya na zawn dawm jahkring kau ya ai majaw mung kabu chyeju dum nga ma ai re.
Shanglawt Asuya kaw na ya na zawn Ja Htu na hkyen da ai shara hpe ginra masha ni ninghkap ai majaw, ginra masha ni hpe Dapba de shaga la na, ahkre ai lam ni mung nga wa ai lam matut chye lu ai re.
Mare mung shawa ni yawng myit hkrum ai the Mare Komiti Myitsu salang marai 30 ram KIO Ginjaw laiza de sa hkrum shaga ai hpang Lung Sha Hku de ja htu na lam the seng na jahkring kau ya sai lam the seng na Lungsha Yang mare masha langai mung ndai zawn tsun ai re.
“Dai ning laman gaw mung shawa hku na laga mi nning hkap ra mat sai, Mare buga woi awn Komiti salang marai 30 ram ginjaw de sa na, ndai kaw ja htu sha ai gaw n mai ai lam a tsawm sha sa tsun sanglang na, Lung Sha HKu Ja htu na lam hpe gan lu jahkring da sai, lama na n jahkring yang gaw, anhte mare masha ni agying naw ninghkap na hku hkyen da ai,” nga tsun ai re.
Lungsha Hku hta Ja htu na lam the seng na jahkring kau ya ai majaw, ginra masha ni kabu chyeju dum ai lam mung tsun nga ma ai re.
Lungsha Yang mare gaw, Putao mare kaba the Deng 40 daram sha tsan ai shara rai nna, dai ginra na mung shawa ni gaw, hkauna galaw nna, madung kanbau bungli galaw ai re hpe chye lu ai.
