Shata mi tup htim gasat nga ai Sengtawng mare na Lucky Man Hotel hta dap jung nga ai Myen hpyen hpung hpe KIA hte PDF pawng hpawm dap ni dai hpawt manap atsai sha gap gasat kau lu sai lam ginra masha ni kaw na chye lu ai.
Myen hpyen n’gun 50 daram hte Lucky Men Hotel hta rawng nga ai Myen hpyen hpung ni hpe KIA the PDF dap maga October praw 7 ya jahpawt kaw na laja lana htim gasat ai hta October 8 ya jahpawt maga hkying 8 daram hta a tsawm sha gap jasan kau lu sai lam shawng lam ma magam gun ni KNG de tsun ai re.
“Dai hpawt hkying 8 daram hta asan sha jasan kau lu sai. Hotel kaw na hprawng pru wa ai Myen hpyen hpung n kau hpe matut htim gasat taw nga ai, Marai 22 hpe gaw, jahkrung lu rim da ai, n kau gaw Hotel kata kaw si rawng taw ai, ya gaw Sengtawng kaw Myen hpyen dap tsep kawp n nga mat sai ngu tsun mai sai,” nga shawng lam magam gun langai KNG de tsun dan wa ai re.
Dai majan hta Myen hpyen dap maga na hpyen la marai 22 hpe jahkrung rim woi da nna, n kau hprawng lawt ai ni mung nga ai re hpe chye lu ai.
Myen hpyen dap maga, September 7 ya shani hta Seng Tawng mare de hpyen man 3 hte htu shadut shang wa nna, Lucky Men Hotel a KTV shara ni hpe sa wang rim ai hpang kaw na gap gasat hkat wa ai rai nga ai.
KIA dap maga na mung Seng Tawng mare pru shang lam yawng hpe wang kau nna, Lucky Men Hotel hta rawng nga ai Myen hpyen hpung hpe sa wang kau nna, Myen hpyen la ni pru n mai mat hkra wang matep gap gasat taw ai majaw, Seng Tawng majan shata mi tup na mat ai re lam tsun ai re.
“Dai hpawt myi mu ai hpang Lucky Men Hotel de shang lu sai nga gaw tsun ai, Zing lu sai nga na gaw tsun ai gade ram gara hku zing lu sai kun hpe chyawm a tsawm tup hkrak rai n chye lu shi ai nga,” Dukaba Naw Bu tsun ai re.
Ya ten Seng Tawng mare mung shawa 6000 jan gaw tinang man ang ai shara ni de hprawng yen hkawm taw nga nna Seng Tawng mare yawng hpe KIA dap maga zing madu da lu sai rai tim, mare dum n’ta law malawng gaw wan hkru hten mat sai re.