Waimaw Ginra Mung Shawa Yawng Shim Lum Ai Shara Ni De Htawt Sit Nna, Hpyen Masa Hpe Galoi Mung Sadi Maja Nga Na Lam Dukaba Naw Bu Tsun
Waimaw makau grup yin hta nga ai mung shawa ni kaw nna, shim lum ai shara ni hpe hkyen lajang da na matu, Dukaba Naw Bu tsun ai re.
Lai wa sai bat kaw na Myen hpyen dap Myitkyina maga de na laknak kaba hkrup mara gap shadam bun ai laknak kaba Waimaw mare kaba makau grup yin hta wa hkra nna, mung shawa si hkala law wa ai majaw, shim lum ai shara ni de hprawng yen na matu tsun wa ai rai nga ai.
“Ya gaw Nawku Jawng ni hkan mung n shim lum mat sai, Myen hpyen dap gaw shara n lata shan hte kam ai hku gap gasat taw nga ai re majaw, mung shawa yawng du ai shara kaw shim lum hkra nga na matu tsun mayu ai, ngut na mung ndai laman Myitkyina maga na laknak kaba jahkring hkring gap bun ai majaw mung shawa si hkala ai lam mung byin taw ai majaw yawng sadi ga ngu mayu ai,” nga tsun ai.
Ya ten Myen hpyen dap gaw, hpyen wa nga n nga hpe garan ginhka ai lam n nga ai sha, mung shawa ni nga ai shara ni hta rai tim, laknak kaba hkrup mara gap shadam bun nga ai majaw, mung shawa ni hku na shim lum ai shara ni de htawt sit hprawng yen na matu tsun tawn ai re.
Matut na rai tim, Myen hpyen dap gaw hpyen yen mung shawa ni sa hprawng yen taw nga ai, Nawku Jawng, Hpungkyi jawng zawn re shara ni hta mung Myen hpyen dap gaw yaw shada lam nga nga hte laknak kaba gap bun ai lam ni galaw taw nga ai majaw, shim lam n nga sai nga matut tsun ai.
Ndai laman Myen hpyen dap gap shadam bun ai laknak kaba ai majaw, Waimaw mare masha 2 asak si hkrum wa sai rai nna, Hkat Cho Mare masha marai 9 mung laknak kaba a majaw asak si hkrum wa sai re.
