Waimaw Wuyan Pyithutsit dap hpe KIA hte pawng hpawm dap maga na Drone hte sa htim gap gasat ai hpang, lahkawng maga majan laja lana gap gasat hkat wa ai re.
June 13 ya shana hkying 6 daram hta, Wuyan Pyihtutsit dap hpe KIA dap maga na Drone hte sa htim gap gasat ai hpang, Myen hpyen dap maga na Holicopter nbungli, laknak kaba ni hte laja lana gap shadam bun wa ai nga Dukaba Nhpang Naw Bu tsun ai re.
“Majan byin ai gaw Wuyan kaw re, Waimaw Hk.Y.Y (58) dap hpe shim lam la ya taw ai ka kin dap ni hte byin ai re, Majan byin taw nga ai laman Myitkyina M.P.Hk de na laknak kaba ni gap ya ai zawn, Holicopter nbungli hte mung wa gap bun wa ma ai,” nga tsun ai.
Myen hpyen dap maga laknak kaba, Holicopter ni hte gap sharu bun ai hpang, shana hkying 9 daram hta majan zim mat sai nga, ginra masha ni tsun ai.
May 18 ya shani Waimaw ginra de KIA hte pawng hpawm dap ni htu shadut htim gasat hpang wa ai gaw, dai ni ten du hkra hpyen masa shaja hkat taw nga ai re.
KIA hte pawng hpawm dap maga na mung, Waimaw hpe zing na masa htu shadut taw nga ai rai nna, KIA dap maga shara la nga ai ni de Myen hpyen dap maga laknak kaba, Drone ni hte shani shagu sa gap gasat taw nga ai re.
Myen hpyen dap ni kaw na ya na zawn laknak kaba gap shadam bun ai majaw, Nawng Si Paw mare de wa hkrat kapaw nna, mung shawa hkala hkrum wa ai hte, dum n ta hkra hten hkrum wa sai re.
Ndai laman Myen hpyen dap kaw na, laknak kaba hkrup mara gap shadam bun nga ai majaw, mung shawa si hkala lam hte dum nta hkra hten ai lam ni ding yang matut byin nga ai re.
