Hpakant Ngapyawtaw lawk hta Balik langai gap sat hkrum ai majaw, Myen hpyen dap maga nawku jawng wang hta ka din ginsup nga ai ramma marai 8 hpe sa rim woi mat ai hpang bai dat dat ya sai re.
Dai ramma marai 8 hpe May 25 ya shana Hpakant Nawku jawng wang hta Ka Din ginsup nga ai ten Myen hpyen dap n-gun kaba hte sa wa nna, sa rim woi mat ai re nga, nta masha langai KNG shiga dap de tsun dan wa ai re.
“Lai wa sai 25 ya shana rim woi mat wa ai, dai hpawt 27 ya jahpawt bai dat dat ya sai, shan hte hpe san jep ma ai da. san jep na hpa mara n nga ai majaw bai dat dat ya ai ga rai nga ai, ya hte nawku jawng shawng kaw balik langai gap sat hkrum ai, dai hpe n tsen n hten ai majaw rim jep wa ai ga rai nga ai,” nga tsun dan wa ai re.
Dai rim woi mat wa ai ni hpe, CCTV ni hkan na hte shabung yu yang shanhte marai 8 hte n lawm taw ai majaw, dai hpawt manap bai dat dat ya sai nga matut tsun dan wa ai re.
Myen hpyen dap maga de na Nawku jawng wang kata de du hkra sa shang rim ai lam gaw, ndai May shata praw hta nawku jawng wang shawng kaw Myen balik langai gap sat hkrum wa ai majaw, ya na zawn hkan rim jep taw ai rai nga ai.
May shata praw hta Nawku Jawng shawng na Gat seng kaw rai sa mari ai Myen Balik langai hpe laknak lang wuhpung ni kaw na sa rim ai ten, dai balik wa kaw na makau grup yin de lagut ngu marawn ai majaw, makau na masha grai law wa ai majaw, laknak lang wuhpung ni hku na dai balik hpe dai shara hta nan gap sat kau da ai lam chye lu ai.
Ya na zawn Myen balik langai gap sat hkrum ai lam hte seng na, dai ramma marai 8 hpe nhtoi 3 ya ram Hpakant balik dap hta san jep ngut ai hpang dai ni bai dat dat ai rai nga ai.
Myen hpyen balik langai gap sat hkrum ai hte seng na Hpakant Ngapyawtaw lawk hta shan hte n tsen n hten ai shara ni hkan sawk jep ai lam ni galaw lai wa sai re.
Myen hpyen dap maga ya ten Hpakant ginra hta, kring mading dap jung da ai shara 6 daram sha nga sai rai nna, lam kaba n tsa hte gat mari hkawm ai hkan yu maya mung shawa hking hte sha nga hkawm mat sai lam dai ginra na mung shawa ni tsun ai re.