Jinghpaw Mung hte Sagaing jarit mayan hta majan laja wa ai hte rau Jinghpaw mungdaw shara shagu hta, Phone Internet line ni yawng pat hkrum taw nga ai lam ginra masha ni kaw na chye lu ai.
November praw 6 ya shani Kawlin muklum hpe KIA woi awn ai hte, PDF pawng hpawm dap ni htim gasat zing madu kau ai hte rau Hti Chyaik muklum de mung htim gasat taw nga ai ten, ya na zawn Phone Internet line ni hpe pat kau ya wa ai rai nga ai.
Ya na zawn Phone Internet line yawng hpe pat kau ya wa ai gaw, Majan shagu hta Myen hpyen dap maga sum machyi lam law taw nga ai majaw, shiga ginlen ai lam ni hpe pat kau ya mayu ai majaw, ya na zawn dan di wa ai masa rai na re nga, ginra masha ni tsun maram da ai re.
Myen hpyen dap maga ya na zawn Phone Internet line pat kau ya ai majaw, Internet hte bungli galaw taw nga ai mung shawa ni yak hkak ginchyum chyat taw nga ai lam chye lu ai.
Ya ten Mogaung, Monyin, Myitkyina ginra yawng hta, MPT, Ooredo, Mytel Phone line yawng hpe pat da ya nna, Atom line sha loi li phone mai shaga taw ai lam chye lu ai.
