Katha mare hta, Myen hpyen dap laknak kaba gap shadam bun ai majaw, mung mare masha marai 2 asak si sum wa ai lam chye lu ai.
Katha Hk.M.Y 309 dap kaw na gap shadam bun dat ai laknak kaba si, Katha lawk 5 de na, nta langai hta wa hkrat kapaw ai majaw, nta kaw nga taw ai dinggai hte, kashu ngu na lahkawng yen dai shara hta nan asak si sum wa ai re lam chye lu ai.
“Ya Katha kaw gaw, lu su ai Miwa, Gala ni gadai n nga ma sai, anhte n lu n lawm matsan mayan re ni sha nga taw ai, ding rai nga taw ai kaw Myen hpyen dap ni gaw shana shagu laknak kaba gap, mana mung dinggai langai hte kashu langai laknak kaba si na majaw si ai, anhte mung katsi katsang she nga taw nga ai,” nga tsun dan ai re.
Katha muklum hta Hk.M.Y 309 dap, Ginwang Balik dap, Muklum Balik dap shara masum hta kring mading shang ngang da nna, Uphkang rung, Hpaji Jawng hte hpungkyi jawng ni hta mung dap jung nga taw ai re lam ginra masha ni matut tsun dan ai re.
Katha muklum hta ya ten laga shinggan de na hpyen manam ni du taw nna, muklum kata manu dan ai arung arai ni hpe hkan lagu mya la hkawm taw nga ai lam chye lu ai.
Ya ten mare kata yak hkak ai mung mare masha ni sha nga taw sai rai nna, lu lawm ai ni yawng tinang shim lum ai shara ni de hprawng yen ma sai re lam chye lu ai.
Katha muklum hta Myihprap wan n lu mata ai, nhtoi 5 ya, 5 na, rai sai hte, jak sau dut ai seng ni mung n nga mat sai re.
Dai majaw, muklum hta rawng nga ai mung mare masha ni ya ten myit shim lum lam n nga, pru hkawm na matu mung yak hkak taw nga ai re.
Katha mare hta Majan byin ai lam n nga ai rai tim, Myen hpyen dap ni kaw na shana shagu laknak kaba gap shadam bun taw nga ai re.
