Manmaw mare kata, Myen hpyen hka sanghpaw li du ai hpang kaw nna, mungshawa ni hkawm sa hkawm wa n mai mat ladu lai san jep ai lam galaw nga ai re hpe chye lu ai.
Ya ten Manmaw kata lawk langai hte langai n mai lai hkat hkra Myen hpyen dap ni sin taw nna, sanghpaw n tsa na arung arai ni hpe htaw lahka la taw nga ai lam, dai ginra na mung shawa langai KNG de ya na zawn tsun dan ai re.
“Myen hpyen dap ni ya sanghpaw kaw na arai jahkrat taw ai re majaw, myo kata kaw blog yawng jahkrat kau nna, rai htaw jahkrat taw nga ai, mung shawa ni hpe lawk hte lawk n mai lai hkra galaw tawn da ma ai” nga tsun dan ai re.
Myen hpyen dap ni ya ten Manmaw mare jut shara shagu hta shimlam la taw nga nna, lai sa lai wa mung mare masha ni hpe hkap jahkring san jep ai lam galaw nga ai sha n ga, mawdaw sengke ni mung rim nga ai re.
Lai wa sai August 19 ya shani hta mung, sengke hte lai wa ai mung mare masha langai hpe hkap jahkring nna, sengke rim zing kau ya ai hte dai mung mare masha wa hkrit ai majaw lagat hprawng ai hpe sinat hte hkan gap ai lam ni mung nga wa ai re hpe chye lu ai.
Ya ten dai hka sanghpaw li hpe shim lam la ya nga ai Myen hpyen hpung ni muklum jut shara shagu hta wa du shim lam la ya nga nna, mung mare masha ni hpe shinggan de pru hkawm ai lam, hka kau de wam hkawm ai lam ni nmai galaw ai nga, Myen hpyen dap tsun n dau da ai re hpe chye lu ai.
Dai zawn mung mare masha ni shinggan de gadai mung pru hkawm n mai ai majaw, gat dut ai mung mare masha ni hta mung yak hkak ai lam ni byin nga ai re.
