Manmaw hte Shwegu lapran na mare kahtawng ni hpe, dai hpawt manap jau hkying 4 daram kaw nna Myen hpyen dap Jet fighter n bungli 2 hte bawm wa jahkrat bun ai hpang, laknak kaba ni hte ding yang gap bun ai lam chye lu ai.
KIA Dung 1 hte Dung 27 ginra, Myalay, Ngapyawtaw hte Kawngtung mare makau grup yin hta n bung li 2 hte wa gap bun kau da ai lam chye lu ai.
“dai hpawt jau hkying 4 chyen daram aten nbungli hte kalang sa jahkrat ai, kalang jahkrat yang 4 hkrat ai, n bungli hte gaw numdaw 2 lang sa jahkrat ngut ai hpang, laknak kaba ni hte dap hpawt hkying 9 daram aten du hkra gap bun ma ai.” nga nna Myalay na asak 50 ning daram re salang langai tsun ai re.
Nbungli bawm ni gaw mare hte loi tsan ai lupwa kawng mayan hta wa hkrat nna, hpang kalang bai jahkrat ai hta mare gawdin pa hta wa hkrat ang ai re lam chye lu ai.
Dai mare hkan na mung shawa ni, ya na zawn Myen hpyen hka sanghpaw li lung wa yang, majan byin na re hpe chye ai majaw, tau hkrau hprawng yen ra nga ai re.
Myen hpyendap gaw Sinhkan kaw nna lung wa na hka sanghpaw li shimlam la ya ai majaw, ya na zawn nbungli, Jet fighter ni hte wa gap bun ai re lam, Manmaw PDF lit nga ai salang langai KNG de ya na zawn matut tsun dan ai re.
“hpa majaw gap ai i nga yang, shanhte lam seng ai hku na re ga rai nga ai, Sinhkan mahkrai pawt hta jahkring tawn ai hpyen hka sanghpaw li hpung ni dai hpawt jau na rawt na hkyen taw ma ai, jak jasu da ma ai, sanghpaw rai n rawt shi yang tau hkrau na jasan da ai masa re ga rai nga ai.” nga tsun ai re.
Dai hpawt manap n bungli hte wa gap ai sha n ga, Manmaw hte laga Myen hpyen dap shara masum na laknak kaba ni hte mung ding yang gap bun wa ai rai nga ai.
Myalay, Kaungtung, Ngapyawtaw, hte dai mare makau hkan na mung mare masha ni gaw, lai wa sai n htoi 5 ya daram kaw nna, tinang man ang ai shara ni de hprawng yen mat ai lam chye lu ai rai tim, dai hpawt laknak kaba gap sharu bun ai lam hte si hkala hkrum ai lam hte seng na a tsawm tup hkrak n chye lu ai re.
Dai Myen hpyen hka sanghpaw li ni gaw, August 16 ya shani, Shwegu kaw na Manmaw de lung wa ai lam hta No. 2 gyip ai mali hka lam hta hkap shing la gasat hkrum ai hta, Sanghpaw 2 hten nna, Sinhkan mare hta wa hkring taw nga ai kaw na, dai ni bai shamu lung wa ai rai nga ai.