Danai Hugawng Lido lam, Jahtu Zup mare makau grup yin ni hta, Majan kaba byin wa na hpe n ra sharawng ai majaw, ginra masha n kau Myen hpyen dap hte Wunpawng Mungdan Shanglawt Hpyendap KIA hpang de sa du hkrum shaga hpyi shawn wa sai lam chye lu ai.
August 27 ya shani Jahtu Zup, Awng Ra, San Pya mare hkan na, Nawku hpung ningbaw hte mare myitsu kanu kawa ni hkrum jahta bawng ban nna, dai zawn hpyi shawn ai re lam Jahtu Zup ginra masha langai KNG shiga dap de tsun ai.
“Madung gaw Majan ginra n shabyin na hta, mung shawa ni sim sa ai hta nga mayu ai majaw, dai hpe lit nga ai mare myit su kanu kawa ni kaw na seng ang ai asuya lahkawng maga de, laika hte mung, n gup ga hte mung hpyi shawn wa ai lam re” nga tsun dan ai re.
Danai Myen hpyen dap D.K.Ts hte KIA Dapba 2 ginra ni de hpyi lajin da ai re lam matut chye lu ai.
Jahtu Zup mare makau grup yin hta Myen hpyen dap n pu, Slg Min Zin Tant woi awn ai Pyi Thu Tsit dap hte KIA Dung 14 dap ni lapran majan gap gasat ai lam hte, hpyen masa shaja hkat taw ai shata 3 ram du wa sai rai nga ai.
Dai rai nna, nkau gaw pyi hprawng yen magang nga sai lam, ginra masha langai matut tsun wa ai.
“Ndai ginra hta majan byin wa na hpe myit tsang ai majaw, asak kaba sai ni hte, ma kaji ni gaw, tiang jinghku jing yu ni hpang de htawt sit yen magang ma sai. N kau gaw masha n yen shi tim arung arai ni yawng htawt magang sai. Jamaw lauban n kau mung pru ma sai” nga tsun ai.
Ya ten, dai hpyi shawn da ai hte seng nna, Myen hpyen dap hte KIA lahkawng maga, kaga mi shana ai lam n nga shi ai lam chye lu ai.
Lai wa sai August 11 ya jahpawt, San Pya mare hta dap jung da ai Min Zin Tant Pyi Thu Tsit dap hpe KIA Dung 14 ni sa htim gap gasat ai lam byin wa sai zawn, si hkala ai lam ni mung nga wa sai rai nga ai.
