Namti mare lahta tsang jawng kaw, Myen hpyen dap ni nga taw ai ten, dai hpawt manap hkying 10 ram hta Bawm kapaw wa ai lam byin wa sai.
Myen hpyen dap ni jawng kaw nga taw ai ten, kadai hkam dat ai re nchye ai, bawm langai kapaw wa ai rai nna, masha si hkala ai ai lam ni gaw n nga ai nga, ginra masha langai KNG shiga dap de tsun ai.
“Dai Hpaji jawng hta Myen hpyen dap ni galoi mung nga ma ai. Dai zawn Myen hpyen dap ni nga ai re hpe chye nna sa hkam kapaw sam ma ai. Kadai gara wuhpung ni re hpe gaw n chye ai. Dai kapaw ai hta rai tim masha hpa si hkala ai lam n nga ai. Jawng shakum loi hkra ai dai ram sha re,” jawng makau nga ai, mung shawa langai KNG shiga dap de tsun dan ai re.
Matut nna, dai hpawt manap hkying 9 ram aten hta sha, Namti Myo Hla lawk na Slg. Win Zaw Tun a n ta hpe ramma la kasha lahkawng sengke hte sa wa nna, bawm sa kabai kapaw kau da ai lam chye lu ai.
Dai sa kapaw ai hta masha hkra hkala ai lam nnga tim, nta hkra hten ai lam nga ai nga, myit chyaw mu masha ni tsun ai.
Slg. Win Zaw Tun gaw Myen hpyen dap hpe shiga jaw ဒလန် hte (ချဲ ၊ နှစ်လုံး ဒိုင်) galaw sha ai wa re nga, mying pru taw ai masha re lam, ginra masha langai KNG de matut tsun dan ai re.
Namti muklum kata dai ni lani mi hta sha, ndai zawn shara lahkawng hta bawm kapaw ai lam byin wa ai majaw ginra masha ni shimlam a matu myit tsang ai lam chye lu ai.