Monyin, Aung Tabay Lawk (2) kaw nga ai Salang Manam Sin Rawng asak (66) ning yi na yu wa ai ten, lam lapran kaw mat mat ai hpang sat hkrum ai lam byin wa ai nga, ginra masha ni tsun dan wa ai re.
Lai wa sai August 8 ya shani Monyin Htan Ta Pin mare a sinpraw dingda maga, Yi na yu wa ai Salang Manam Sin Rawng hte madu jan kashu marai masum rau yu wa ai kaw na, Salang Sing Rawng gaw hpyen gyepdin hte shawng de chyang hkawm mat ai hpang, ya na zawn sat hkrum wa ai masa re lam chye lu ai.
Rau yu wa ai madu jan hte kashu gaw, Salang Manam Sin Rawng a lit hpe lam makau kaw mu ai majaw, dai grup yin kaw tam marawn yu ai rai tim, nmu ai majaw, n ta de wa mat sam ai ngu shi gun ai lit hpe plastic hte magap da ya nna, shan woi dwi yan mung n ta de wa mat ai nga, ginra mung shawa langai KNG shiga de n dai zawn tsun dan ai re.
“August 8 ya jahpawt yi na shan hte masum rau yu wa ma ai, ya si hkrum ai Manam Sin Rawng gaw hpyen hkyepdin din nna shawng de chyang mat ai, hpang kaw hkan nang lawm yu wa ai hkan woi dwi gaw shi gun ai lit hpe wa mu ai, dingla wa gun ai lit hpe wa mu ai majaw makau grup yin hkan naw tam yu marawn yu ai, daw hkrawng hte shi gup ai muga kaw gaw sai kap ai hpe mu ma ai da, shan woi dwi mung n ta de wa mat ai rai n hten kun nga hkan wa mat ma ai; n ta kaw du tim n mu na bai sa tam na ngu yang, marang htu hkashi kaba mat ai majaw hpang shani she bai sa tam yang gaw, lagaw kaw shi gun ai htingga jinghpa sumri hte gyit da nna, kahtan kaw ningma langai, baw kaw ningma kaba langai hte rai si taw ai hpe sa mu ai” nga tsun ai re.
Manam Sin Rawng August 8 ya shani mat mat ai rai nna, dum n ta masha ni hpang shani bai sa tam yang, lagaw kaw sumri gyit hkang hte baw kaw ningma hkang langai hte si taw ai hpe sa mu ai lam chye lu ai.
Dai ginra gaw, Sam Hkyeng SNA hte KIA lahkawng maga hpyen shamu shamawt ai ginra langai re lam chye lu ai.
Salang Manam Sin Rawng a kasha Ma Naw madaw gaw KIA magam gun rai nna dai ning February shata kaw shawng lam majan kaw hkrat sum mat sai re lam chye lu ai.
Dai ginra na mung shawa n kau gaw KIA magam gun a kawa re majaw, SNA wuhpung ni sat kau ya ai lam ni tsun taw ai raitim n dai lam hte seng na KNG alak mi sha teng lu ai lam n nga ai re.
