Sezin mare, Myen hpyen dap hte SNA hpyen dap shara lahkawng hpe KIA hte PDF gasat zing la

Nawng Lut Ginwang, Ta Mahkan hte Sezin kaw na, Myen hpyen dap hte Sam Hkyeng Hpyen Hpung SNA pawng hpawm dap shara lahkawng hpe, Wunpawng Mungdan Shanglawt Hpyendap KIA hte Mung Shawa Makawp Maga dap PDF pawng hpawm ni, dai hpawt August 8 ya, manap jau sa htim gap gasat zing madu la sai lam chye lu ai.

Se Zin mare Myen hpyen dap Hk M Y 119 dap hte Sam Hkyeng SNA dap ni nga ai Shwe Pyi Thit ( ရွှေပြည်သစ်) mare na dap shara lahkawng hpe sa htim gap gasat ai hta, Myen hpyen dap maga na sum machyi lam law nna, sinat laknak machyu pala n kau hpe mung padang dip zing la lu ai re lam chye lu ai.

Majan byin ai lam hte seng nna ginra masha langai tsun ai gaw, “ Dai hpawt manap maga hkying 1 ram kaw na sinat ngoi hpang ai dai hpawt hkying 6 ram du hkra re. KIA ni hpyen dap hpe sa gap sam ai, anhte gaw hkrit na shinggan de n gwi pru yu ai, ya majan byin ai hpang n bungli hte bai sa gap wa na hpe mung tsang taw ai,” nga ginra masha langai KNG shiga dap de tsun wa ai.

Dai dap shara lahkawng hta lai wa sai July shata kaw na, Myen hpyen dap hte Sam Hkyeng Hpyen hpung SNA ni pawng hpawm hpyen n gun 200 ram wa jat nga nna, mung shawa ni hpe gara de mung n pru hkawm shangun ai sha, hpyen ning gang shatai na nga taw ai dap shara re lam ginra masha ni tsun ai.

Dai hpawt sa htim gap gasat ai hta Myen hpyen dap maga de na 60 mm galu lau (1), RPG Lau (1), sniper lau (1), sinat kadun lau (1), MA 1 lau (1), MA 2  lau (1), hte SNA hpyen hpung ni kaw na M22 lau (3), M23 lau (1), M 16 lau (1) hte Machyu pala alaw alam hpe mawdaw kaji 2 hte htaw zing la wa sai lam shawng lam hpyen shi sawk ni tsun ai.

Myen hpyen dap daru magam zing kau ai hpang, Sam Hkyeng hpyen hpung SNA ni kaw nna, Nawnglut ginra ni hta shara la madu mayu wa ai majaw, Myen hpyen dap hte pawng hpawm nna, hpyen shamu shamawt ai lam ding yang galaw wa nga ai rai nna, KIA PDF hte jahkring hkring gap gasat ai lam ni mung byin nga ai re.

Dai shara ni hta lai wa sai shata kaw na Myen hpyen dap hte KIA PDF pawng hpawm dap ni majan laja lana gap gasat hkat wa ai shara rai nna, ya ten dai ginra na mung shawa n kau, Hpakant Tamahkan maga de hprawng shing byi taw nna, garum ningtum mung ra kadawn nga ai lam chye lu ai.

Read Previous

Jahtu Zup Pyi Thu Tsit hpyen dap ningnan bai gap jat

Read Next

Namti mare kata, shara lahkawng kaw bawm kapaw

Leave a Reply

Your email address will not be published.