Katha ginwang, Mali Hka lam mayan Myen hpyen Hka sang hpaw li hpe shim lam la ya na matu lagaw lam hte yu wa ai Myen hpyen hpung ni hpe Moe Thar Lay mare makau kaw, Wunpawng Mungdan Shanglawt Hpyendap KIA hte Mung Shawa Makawp Maga Dap PDF pawng hpawm dap ni hkap shing la gasat dat ai hta Myen hpyen marai 4 hta n yawm, si ai nga, shawng lam hpyen shi sawk ni tsun dan ai kaw na chye lu ai.
Dai hpawt manap hkying 8 ram aten Sin Kung mare (ဆင်ကုန်းကျေးရွာ) kaw na hpyen n-gun 80 ram hte, mani Mandalay kaw na lung wa ai Myen hpyen Hka Sang Hpaw Li 6 hpe shim lam la yu na matu shamu shamawt hkawm wa ai ten, Moe Thar Lay (မိုးတားလေးကျေးရွာ) mare shang wa ai hta hkap shing la gasat hkrum ai re nga Katha PDF na lit nga ai ni KNG shiga dap de tsun dan ai.
“Mandalay kaw na lung wa ai Myen hpyen Hka Sang Hpaw Li 6 hpe shim lam la ya na matu Sin Kung mare (ဆင်ကုန်းကျေးရွာ) kaw na lagaw lam hte Moe Thar Lay mare (မိုးတားလေးကျေးရွာ) maga de lai yu wa ai, Myen hpyen hpung ni hpe hkap shing la gasat ai re. Dai hkap gasat ai hpang lahkawng maga minute 45 ram gap hkat ai hpang Myen hpyen la marai 4 si ai hte yawm htum marai 3 ram hkala hkrum ai hpe mu kau da ai,” nga Katha PDF na lit nga ni KNG shiga dap de tsun ai.
Mani hpawt Mandalay kaw na lung wa ai Myen hpyen dap malu masha hte hpyen lang arung arai htaw da ai Hka Sang Hpaw Li 6 gaw, dai hpawt manap jau hkying 5 ram aten ကျောက်မြောင်း ginwang de du shang taw sai rai nna, Manmaw maga de lung wa ding yang re lam chye lu ai.
Ya ten Myen hpyen dap ni kaw na Sagaing ginra lahta daw hte Jinghpaw Mungdaw ginra ni hta Mali hka lam hku na hpyen lang arung arai hte malu masha dingyang htaw shalai bang taw ai rai nna, hpyen masa lam mung ding yang shaja hkat taw nga ai lam chye lu ai.
