Manmaw de Myen Hpyen Hka Sanghpaw du ai hpang, Manmaw kaw majan bai byin taw ai nga shawng lam hpyen magam gun hte ni nawn ai ni tsun ai re.
Mani September praw 6 ya jahpawt Manmaw kaw rawng nga ai Myen Hpyen hpung ni Nmawk maga de Hpyen n gun htu wa ai majaw, majan byin taw ai lam chye lu ai.
Myen Hpyen Hka Sanghpaw kaw na Laknak malu masha hpyen n gun du lung wa ai majaw, Majan bai hpaw wa ai masa re nga, Hpyen masa yu maram taw ai salang langai KNG shiga de tsun dan ai re.
“Hka Sanghpawli kaba 7 lu du ai ngu gaw n loi ai lam rai nga ai, Hpyen ni laknak malu masha grai bai grung mat sai, Laknak hpyen n gun grung ai majaw, bai htu gasat wa sai ga rai nga ai, Mani hpawt kaw na bai nut hkat taw sai, Nmawk lam maga de htu lung wa ai da,”nga tsun dan ai re.
Manmaw kaw man pa gap gasat hkat ai lam n nga ai, shata 3,4 daram na ai hpang, ya Myen hpyen sanghpaw du ai hpang, majan bai byin wa ai masa lam re nga hpyen masa yu maram ai ni tsun ai re.
Manmaw kaw Majan n byin laknak kaba n ngoi ai shani gaw n nga ai daram re lam shawng lam hpyen magam gun ni kaw na chye lu ai.
Lai wa sai 2025 ning August shata Myen hpyen hka Sanghpawli 13 du shang ai hpang, KIA PDF pawng hpawm ni gasat zing tawn sai shara, nkau hpe bai tat sum kau ra mat ai lam nga wa sai re.
Ndai kalang hka sanghpawli 7 du shang ai hta, laknak malu masha, hpyen n-gun gade daram bai jat ai ngu hpe a tsawm tup hkrak n chye ai rai tim, Majan kaba bai hpaw wa na masa nga ai lam n tsa na salang wa matut tsun maram da ai re.
