Gumshem Myen Hpyen dap ni KIA hte pawng hpawm dap ni htim gasat tawn ai Sin Hkan mare hpe bai gasat zing madu la lu na matu, lagaw dap, nbungli kaw na laja lana gap gasat wa ai lam nga ai hpe chye lu ai.
September praw 5 ya jahpawt Sin Hkam Mare kaw Hka Sanghpaw kaw na lawm lung wa ai Myen hpyen n kau hpe tawn da nna, Shwegu maga na lagaw lam hku lung wa ai Myen hpyen ni pawng nna, Sin Hkam mare hpe laja lana htim gasat wa ai re.
Sin Hkan mare hpe htim gasat ai hta, Myen hpyen hka sanghpaw hpe hkap shingla gasat ai Sin Hkan Mahkrai hpe Myen hpyen nbungli kaw na laja lana gasat bun wa ai majaw, Sin Hkan mahkrai masa lam hte seng na, ginra masha langai KNG shiga de n dai zawn tsun dan ai re.
“September 5 ya shani, shani tup wa gap sharu bun ai, Jet kaw na Pound 500, 1000 kaba ai laknak ni hte wa gap sharu bun ai, Sin Hkan Malihka mahkrai lahkawng nga ai kaw na, Wanleng lam mahkrai wa daw mat ai, Mawdaw lam maga na gaw naw mai lai ai,” nga tsun ai re.
Myen Hpyen Hka Sanghpawli 2 na Myen hpyenla nkau dawnghkawn hpraw sharawt asum jaw rim hkam ai hpang, Pawng hpawm dap maga na Myen hpyen bawng masha ni hpe Sin Hkan mahkrai npu hku shim lam la nna, woi gawp shalai wa ai hpe online n tsa hkan pru ai Video ni hta mu lu nga ai re.
KIA PDF dap maga dai zawn machyu shingbyi ai lam galaw ai majaw, hpyen masa hku nna, dai shara ni hpe nbungli hku laja lana gap jahten wa ai masa re lam hpyen masa yu maram ai ni tsun da ai re.
Myen hpyen maga Sin Hkan mahkrai hpe gap jahten ai gaw, hpyen masa a majaw gap jahten ai re lam hpyen masa yu maram ai salang langai KNG shiga de n dai zawn matut tsun dan wa ai re.
“Sin Hkan mahkrai hpe Myen ni gap jahten ai gaw, hpyen masa na majaw rai nga ai, dai mahkrai n pu kaw shim lam la nna, hka sanghpaw hpe hkap shingla gasat re lam ni a majaw rai nga ai, dai sha n ga, bawng masha ni hpe mung mahkrai n pu kaw shim lam la shangun nna woi mat ai bai rai, dai majaw rai na re ngu maram lu ai le,” nga tsun ai.
Shwegu kaw na manmaw de lai lung wa ai Myen hpyen hka sanghpawli 3 hpe KIA PDF pawng hpawm ni hkap shingla gasat kau lu wa ai sha n ga, Hka Sanghpaw 2 kaw na Myen hpyen ni asum jaw rim hkam lai wa sai re.
Dai hpang Myen hpyen hka sanghpawli 7 Manmaw de du lung mat ai lam chye lu ai.
