Hka Garan Yang mare makau kaw mawdaw la hpe gap sat ai Salang kaba hpe ahkyak la da ai zawn amu manghkang hpe gumhpraw hte pri nem shangut da sai lam chye lu ai.
Lai wa sai July 24 ya shani Myitkyina kaw na, sau htaw nna lung wa ai Mawdaw la hpe Ninghtawn Salang kaba langai gumhpraw hkap hpyi ai ten gumhpraw n jaw ai majaw nga nna mawdaw la hpe Ninghtawn Salang kaba wa gap sat kau ai mabyin byin lai wa ai re.
Mawdaw la hpe gap sat kau ai n htoi 11 ya na ai hpang she dai mawdaw la wa hpe gap sat tawn ai hpe mu tam ai nga, nta masha hte ni nawn ai ni tsun ai re.
Dai gap sat ai Salang kaba wa gaw, Ninghtawn Du Salang kaba Dumdaw Naw Tawng ngu ai wa re hpe chye lu ai.
KIO maga na gaw, gap sat hkrum ai mawdaw la a dum n ta masha ni hpe gumhpraw hte pri nem hkra galaw ngut ai zawn mara tawt lai ai Salang kaba wa hpe Hpyen tara rung kaw na tsaw dik ari jahkrat dawdan sai lam sagawn chye lu ai re.
Mara tawt lai ai Salang kaba hpe hpyen tara rung kaw na tsaw dik ari jahkrat ai mi nga tim mung shawa Media ni hpe brang lang ai hku htawng madun ai lam n nga ai gaw brang lang ai tara dawdan lam n re ai nga, Jinghpaw tara kasa langai n dai zawn tsun madi madun da ai re.
“Kaja nan ndai zawn re lam hpe, mung shawa ni yawng hpe chye shangun ra ai, media ni de htawng madun gwi ra ai, tsang hte tsang na san jep ai matsing ningting ni hpe mung htawng madun dan gwi ra ai, Hpyen tara rung kaw na kaning re tara jeyang dawdan ai ngu hpe Mung shawa hte Media ni hkan htawng madun ra ai, dai she mung shawa ni a makam lu ai asuya kaja langai byin tai na rai nga ai,” nga tsun ai re.
Gap sat hkrum ai mawdaw la gaw, Namti mare na Shanglawt Du kaba langai a mawdaw shap gau ai, Salang Lagwi Bawm Chang ngu ai wa re lam sagawn chye lu ai.
Salang Lagwi Bawm Chang gau lung wa ai sau htaw mawdaw hpe Hka Garan Yang mare du wa mahka, Hkatut lam numshe kaw Ninghtawn Salang kaba Dumdaw Naw Tawng gumhpraw hkap hpyi yang, mawdaw la wa gumhpraw n jaw ai majaw si nat gap sat ai lam byin lai mat ai rai nga ai.
Salang kaba wa hpe san jep ai shaloi, n ta de na madu jan ma yan nu ni gumhpraw htet ai ten gumhpraw n lu ai majaw ya na zawn lata shalai kau nna gap hkra mat ai masa re nga dai ginra de na mung shawa ni tsun ai re.
Ndai lanam ta ten laman Myitkyina-Putao lam kaba kaw Three-Ground mawdaw hte sau htaw mawdaw n lai na matu KIO Asuya maga pat hkum tawn ai lam nga ai hpe chye lu ai.
