Shwegu kaw na Manmaw de lung wa ai Myen hpyen Hka sanghpawli nkau Manmaw de du sai lam, shawng lam hpyen magam gun ni tsun shateng wa ai re.
Mandalay kaw na lung wa ai Hkasanghpaw 14 hta na dai ni Manmaw de du mat ai Sanghpaw 7 re lam shawng lam magam gun hte matut mahkai nga ai Salang langai KNG de tsun dan wa ai re.
โMana Yeni kaw wa yup ai Sanghpaw hpung ni dai hpawt jau na lung wa ai, lam lapran gasat gaw naw gasat ai, rai tim dai mayan gaw hka dam mat ai majaw gaw n loi mat sai, Myen ni ding yang Nbungli the bai pyen gayin rai yang gaw apyaw sha du lu mat ai ga rai nga ai,โ nga tsun ai re.
September praw 2 ya shani Shwegu kaw na Manmaw de lai lung wa ai Hka Sanghpawli hpung ni hpe KIA hte PDF pawng hpawm ni Sin Hkan mahkrai n pu kaw hkap shingla gasat ai hta Sanghpawli 3 hpe lu gap jahten kau nna, Sanghpawli 2 gaw dawnhkawn hpraw sharawt asum jaw rim hkam wa ai re.
Sanghpaw 5 daram hpe pawng hpawm dap maga hkap lu shingla gasat ai rai tim, kaga ngam ai Sanghpaw 7 daram gaw Manmaw maga de lu lai mat ai hpe chye lu ai.
Dai lu lai lung mat ai Sanghpaw kaba 7 gaw September 2 y a shana Manmaw lawu Yene mare kaw wa hkring nna, dai hpawt manap jau Manmaw de lai lung wa ai hpe KIA maga bai shingla gasat ai majaw, majan gasat gala byin wa ai hpe matut chye lu ai.
Dai sanghpaw kaba 7 hte rau Hpri Sanghpaw kaba hpe kanawng ai Sanghpaw kaji 6 mung lawm ai lam matut chye lu ai re.
Mandalay kaw na lung wa ai Sanghpaw hpung ni hta Hpyen Sanghpaw kaba lahkawng lawm ai kaw na, langai hpe gaw lu gap jahten kau ya ai rai nna ngam ai langai sha Manmaw de lu lai bang mat ai rai nna, kaga ngam ai sanghpaw 6 gaw Malu masha the laknak machyu pala htaw ai sanghpaw kaba ni re lam chye lu ai.
Dai Sanghpaw hpung ni gaw, Mandalay kaw na August 21 ya shani lung wa nna, dai ni September praw 3 ya shani Manmaw de Sanghpaw 7 du wa lu ai rai nga ai.
