Maigan du bungli galaw masha ni tinang buga dum n ta de gumhpraw shagun shalai ai lam kaw, tara shang ai lam hku na galaw na matu Myen hpyen asuya kaw na dip n gun jaw nga ai lam chye lu ai.
Maigan du bungli galaw masha yawng gaw, tinang kanu mungdan de shata shagu tinang lu ai kaw na tsa lam shadang 25 hpe tara shang ai lam hku na shalai na matu atit anang tsun shadut da ai hpe mu mada lu ai re.
Myen hpyen dap daru magam zing kau ai hpang hpyen rim lahkawn ai lam ni laja lana galaw wa ai majaw, Ramma law malawng gaw maigan de pru nna bungli galaw hkawm ai law wa ai mung rai nga ai.
Myen Hpyen asuya kaw na gumhpraw shalai ai ni hpe ahkyak la wa na lam, Kpay, Wave Pay, the kaga gumhpraw shalai ai Myen mung Bank system yawng hpe pat kau ya na lam tsun wa ai majaw, Maigan du Myen mung bungli galaw masha ni myit tsang ai lam, Thai kaw nga ai ramma langai shi a mu mada lam hpe n dai zawn tsun dan ai re.
“ Ya anhte n dai Thai kaw nga nna, Kpay hte Thai Bank Acc lang nna, mai byin dang di ai daram chye ai ni hpe gumhpraw manu hkyam sa ai the shalai ya taw ai re. Ya Myen hpyen kaw na tsun taw ai lam gaw hpa re kun gaw a tsawm n chye shi ai. Kpay ni pat kau ya na nga jang gaw, yawng ni grai yak sai,” nga tsun ai re.
Maigan mungdan de bungli galaw hkawm mat ai bungli galaw masha ni kaw na shang gumhpraw hkawn kang hta taw ai sha n ga, lu ai shata shabrai kaw na dum n ta de shalai ai kaw na hkawn kat bai hta na lam galaw wa ai majaw, Maigan du htawt sit bungli galaw masha ni lam shagu yak hkak wa taw ai lam mung rai nga ai.
Maigan du htawt sit bungli galaw masha ni gaw, tinang du nga ai mungdan kaw tara shang nga pra lu na matu Myen hpyen asuya kaw na masat masa galaw ai lekmat galaw la ra ai re majaw, Myen hpyen hpe hkawn kang n kam bang ai rai tim, lekmat galaw ai hta mayak lam n nga hkra shakut ra ai majaw, n jaw bang mayu ai rai tim, dai lekmat galaw ai kaw kalang dat di la kau ya ai majaw, bungli galaw masha ni hta mayak byin hkrum taw nga ai mung rai nga ai.
Myen hpyen maga gumhpraw shalai ai hta dip n gun jaw wa ai majaw, maigan du myen mung masha ni grau nna yak hkak wa na masa nga ai lam Myen mung Shiga ni hta mu lu nga ai re.
