2022 ning Happy KTV kaw rim woi hkrum ai Salang kaba ni yawng September 16 ya jahpawt Myitkyina htawng na lawt pru wa sai lam chye lu ai.
2022 Ning November 12 ya jahpawt Myitkyina Dapkawng, Ja Nmaw lam kaba n tsa na Happy KTV kaw rim woi hkrum ai salang kaba ni yawng bai lawt pru wa ai lam hte seng nna, salang langai KNG shiga de n dai zawn tsun dan ai re.
“𝒍𝒂𝒊 𝒘𝒂 𝒔𝒂𝒊 2022 𝒏𝒊𝒏𝒈 𝑯𝒂𝒑𝒑𝒚 𝑲𝑻𝑽 𝒌𝒂𝒘 𝒓𝒊𝒎 𝒉𝒌𝒓𝒖𝒎 𝒂𝒊 𝑺𝒂𝒍𝒂𝒏𝒈 𝒌𝒂𝒃𝒂 𝒏𝒊 𝒚𝒂𝒘𝒏𝒈 𝒃𝒂𝒊 𝒍𝒂𝒘𝒕 𝒑𝒓𝒖 𝒘𝒂 𝒔𝒂𝒊, 𝒎𝒂𝒏𝒊 𝒉𝒑𝒂𝒘𝒕 𝒉𝒌𝒚𝒊𝒏𝒈 10 𝒓𝒂𝒎 𝒉𝒕𝒂 𝑷𝑪𝑮 𝒏𝒂𝒏 𝒔𝒂 𝒕𝒂𝒖 𝒘𝒐𝒊 𝒍𝒂 𝒔𝒂𝒊,” nga tsun dan ai re.
Lawt pru wa ai Salang kaba ni hpe PCG Salang Lamai Gum Ja Myitkyina Htawng kaba kaw sa tau woi la ai hpe chye lu ai.
Mani hpawt lawt pru wa ai Salang kaba ni gaw, Salang Kaba Naw Ban, Slkb Sumlut Tu Shan, Slkb Mung Dan, Slkb Mung Ra, Slkb Brang Hkum, Slkb Naw Li, Slkb Hkaw Ying, Slkb Hkun Awng, Slkb La Awng, Slkb Awng Gam, Slkb Naw Awn, Slkb Bawm Chang hte Aung Pyi Sone ni re lam chye lu ai.
November 12 ya jahpawt dai salang kaba ni hpe Happy KTV kaw na rim woi la nna, Myitkyina dingdung daw myen hpyen dap daju M.P.Hk de rim woi mat nna, စစ်ကြောရေး kaw shata mi daram san jep ngut ai hpang she Myitkyina htawng kaba de shalai ap ya nna, tara kanu 17/1 hte tara jewat hkrum lai wa ai re.
Tara kanu 17/1 hte htawng dam 2 ning jan sharen ngut ai hpang, September 16 ya jahpawt bai shalawt dat ya ai rai nga ai.
Lai wa sai 2022 ning daram hta KIO Salang kaba ni KTV kaw jahkring hkring rim hkrum ai lam law wa ai majaw, Laiza, Maijayang, Hpakant KIO Uphkang ginra na KTV ni pat na lam KIO ginjaw kaw na ndau lai wa sai re.
