Sen n htu shi yang, rim da ai bawng dat ya na lam jahkrup nga

Dingdung Daw Daphpawm, hpung 4 dazik ni

Gap hkat jahkring sen n htu shi yang, maga lahkawng rim da ai bawng masha ni hpe shawng dat ya na lam hpe Myen asuya hte Dingdung Daw Daphpawm lapran, jahkrup nga dingyang naw re lam chye lu ai.

Miwa lapran tsap garum ya ai npu, Yunnan mungdaw mare daju Hkwiming (Kunming) kaw wuhpung lahkawng dat kasa ni December 15, daining hpang jahtum hku nna hkrum shaga hkat ai shaloi, Myen hpe DDD maga dai lam tang madun ai rai nga ai.

“Dai ya kade nde na rim da ai ni hpe dat ya na lam hte seng nna, matut nna n rim na lam hte seng nna re ni hpe bawngban ngut jang gaw lakmat htu na ngu tsun da ai lam nga ai. Raitim dai ya naw jahkrup taw nga ai, rai n ngut kre shi ai re,” nga nna Hkwiming zuphpawng hta lapran salang hku sa lawm ai, Myitkyina daju Peace-talk Creation Group (PCG) na Duwa Lamai Gum Ja tsun ai.

Ndai gabaw hte seng nna du na 2020 January shata hta bai wuhpung lahkawng hkrum shaga na myit hkrum da ai lam, Duwa Gum Ja tsun ai.

Lai wa sai November 28 hta sha, Nawnglut ginra Loi Paw kahtawng kaw KIA Dapdung (26) hte (44) na salang kaba langai hte magam gun yawng marai (4) hpe Myen hpyendap Hk.L.Ya masat (4), Du Jum Zaw U woi awn ai hpyen hpung kaw nna wang rim kau ai lam ni galaw ai re.

Bai nna Laiza shang wa chyinghka, Myitkyina-Manmaw lam Nam San Yang mawdaw daru kaw nna mung shanglawt magam gun ni hpe Myen hpyendap ni rim ai lam ni galaw nga ai re.

Amyusha rawt malan hpung, Wunpawng Mungdan Shanglawt Hpyendap KIA, Rahkai AA, Balawng TNLA hte Kokang MNDAA ni gaw Myen asuya-hpyendap hte gap hkat jahkring sen htu lu hkra, 2018 ning kaw nna jahkrup wa ai raitimung ya ten du hkra gaw garai n hkrum shi ai re.

Read Previous

Myen asuya dap hte KIA Dung (36), gap hkat lam byin

Read Next

Mungbaw KIA (36) shara yen ya, Myen hte majan zim mat

Leave a Reply

Your email address will not be published. Required fields are marked *