Lawa Ninghtawn, Hkumtsai Yang Hpyen yen mung shawa ni mare de bai n htang wa nga na matu Mare Wunli la kyuhpyi hpawng lamang galaw wa ai lam chye lu ai.
Mare Wunli la akyuhpyi lamang hpe September 24 ya shani Hkumtsai Yang mare Hpaji jawng kaw galaw ai hta, mung shawa marai (200) daram wa du shang lawm ai hpe chye lu ai.
Hkumtsai Yang Mare mung shawa ni gaw, Lai wa sai 2025 Ning April shata kaw na, KIA hte Warazup Pyithutsit hpyen hpung ni hpyen masa shaja hkat wa ai majaw, hprawng yen ai mare kahtawng langai mung rai nga ai.
Ya na zawn mare buga de bai n htang wa ai lam gaw hpyen yen dabang kata kaw lam amyu myu mayak lam ni law wa ai majaw, tinang mare buga de bai n htang wa na lam dawdan wa ai re nga, Hkumtsai Yang mare masha langai KNG hpe n dai zawn tsun ai re.
โHpyen yen dabang kaw nga taw tim, moi na zawn gadai n garum mat sai, bungli gaw n lu gunrai manu gaw rawt, lusha mayak sha n ga, kaga mayak lam ni law wa ai majaw, mare de wa na matu dawdan mat wa sai ga re,โ nga tsun ai.
Ndai laman Hkumtsai Yang mare kaw wa nga hpang ai mung shawa htinggaw 50 daram du sai lam chye lu ai.
Hkumtsai Yang Mare ni rai n wa shi yang, Lawa mare mung shawa nkau shawng wa nga hpang ai re lam chye lu ai.
Lawa mare ni mare buga de bai n htang wa na matu Warazup Pyithutsit ni Ja gumhpraw garum wa ai sha n ga, Hkauna ni mung shawt ya ai lam nga ai hpe chye lu ai.
Lawa mare ni hpe Warazup Pyithutsit ni garum jaw ai rai tim, Hkumtsai Yang mare ni hpe garum jaw ai lam nga n nga hpe gaw a tsawm tup hkrak n chye lu shi ai re.
Hkumtsai Yang mare gaw, Hugawng Lido lam kaba n tsa Lawa hte Dumbang mare lapran na mare kahtawng langai rai nga ai.
