Mungmyit Ginra na Myen Hpyen Dap Shara (1) KIA Pawng Hpawm Dap Htim Gasat Zing
Balawng a lata kaw na, Myen hpyen lata de bai ap kau ai, Mungmyit Mare kaba makau Nyaung Ni Mare makau kaw Majan laja lana gasat poi byin wa ai lam chye lu ai.
Dai ni September 28 ya jahpawt kaw na dai na maga hkying 1 aten daram du hkra majan laja lana gap gasat wa ai re lam shawng lam hpyen magam gun langai ndai zawn tsun dan ai re.
“Dai hpawt kaw na Nyaung Ni mare kaw dung ai Myen hpyen dap hpe sa htim gasat ai, dai ni shani ka-ang ten daram kaw Shwe Min Tin dap shara post hpe gasat zing madu lu ai. Myen hpyen maga na sinat laknak n kau padang dip zing la lu ai le,” nga tsun ai re.
Ya majan byin ai shara gaw, Nmau hka grup yin Mungmyit hte Myitsone mare lapran na Myen hpyen dap shara re lam chye lu ai.
Myen hpyen maga dai hpawt manap kaw na dai ni tup nbungli hpan hkum hte wa gap gasat ai lam ni nga wa ai lam matut chye lu ai re.
Dai dap shara gaw, moi kaw na tim Myen hpyen ni dung da ai shara rai nna, Balawng TNLA Mungmyit hpe gasat zing kau ai ten, TNLA dap ni mung wa gan dung ai dap shara re lam chye lu ai.
TNLA hte Myen hpyen ni gap hkat jahkring kau ai hpang, Mungmyit mare hpe Myen hpyen lata de bai jaw kau nna, Myen hpyen ni bai wa du dap jung tawn ai, Shwe Min Tin mying ai dap shara langai rai nga ai.
Myen hpyen ni gaw, Manmaw hpe htim gasat na matu Mali hka lam hku hpyen n-gun sa htu gasat yu ai rai tim, sum machyi law ai majaw bai hting nut mat nna, ya Mungmyit Mabeing lam maga hku hpyen n-gun kaba hte bai htu shadut taw ai masa re lam, shawng lam hpyen magam gun ni tsun ai re.
Ndai laman Myen hpyen ni Mungmyit Mabeing maga hku hpyen n-gun kaba jat bang nga ai majaw shani shagu ngu na majan byin taw ai lam chye lu ai.
