Mungbaw KIA (36) shara yen ya, Myen hte majan zim mat

Shawnglam ginra langai kaw mu lu ai KIA Dung 36 hpyenla langai, Lahta Sammung

Dec. 20, bat Manga Ya shani, KIA Dapdung (36) ni tinang shara de htu lung wa ai Myen hpyen hpung ni hpe aten kadun mi gap shingla nna yen ya ai hpang, gap hkat ai lam ni matut n byin sai re.

Dai shani shana kaw nna KIA Dung (36) hte Ginwang rung nga ai shara hta Myen ni dung mat ai re nga ai.

“Dai 36 ni nga ai Ting Sa Kawng, dai mung yen kau nna, 36 hte Ginwang ni nga ai shara de mung Myen ni dung mat sai gaw,” nga nna Lahta Sammung Munggu Ginra KIA Dapba (6) na hpyendu langai, anhte Jinghpaw Shiga Dap de tsun ai.

Myen Dapnu (99) hpyen hpung ni gaw, Dung (36) shara de Talung hte Namtau, hpyen man lahkawng hku htu lung wa ai hpe Talung hku na lung wa ai ni hpe sha Dung (36), Kung-1 ni ninghkap gasat ai re lam, lahta na Ba (6) salang wa tsun ai re.

KIO Ginjaw gaw asuya dap ni hpe matut hkap hkan gasat na matu hpa n matsun ai hte, maga mi de asuya dap ni gaw grau nna KIA a jinghku dap, Balawng TNLA, Rahkai AA hte Kokang MNDAA ni hpe madung hkan tam gasat ai masa re majaw mung, KIA hte matut gap hkat na masa n nga ai nga nna, lahta na salang wa dinglik tsun wa ai re.

Gap hkat jahkring sen htu na lam hte seng nna, Myen asuya simsa lam dat kasa hpung hte Dingdung Daw Daphpawm, hpung (4) salang ni gaw, Miwa asuya lapran tsap garum ai npu, Dec. 15 hta Yunnan mungdaw Hkwiming (Kunming) kaw hkrum shaga wa sai re.

Du na shata, 2020 hta bai wuhpung lahkawng hkrum bawngban na matu myit hkrum tawn ai hpe, Myitkyina daju simsa lam akyu galaw hpung, PCG na Duwa Lamai Gum Ja tsun ai re.

Read Previous

Sen n htu shi yang, rim da ai bawng dat ya na lam jahkrup nga

Read Next

“Jinghpaw Mungdaw” mying n galai na KIO matsun

Leave a Reply

Your email address will not be published. Required fields are marked *