Chyihpwi mare makau nlung ga jak rung na pru ai num hpu shing mun ni a majaw dai ginra na Ma kanu ni hte Ma kaji ni n sa sa chyat nna nga yak ai mabyin hkrum nga ai lam chye lu ai.
“Anhte up hkang salang wa hpe san yu ai shaloi asuya gaw ahkang njaw da ai da. Shanhte uphkang salang ni galaw ai re nga tsun ai. Nlung kaba ai ni hpe gaw Hydraulic hte ga taw ai wa sinat gap taw ai zawn grai garu ai. Anhte pyi nlu nga ndang hkam ai” nga nna Chyihpwi ginra masha Slg. Hanggau Zawng Dau Jinghpaw Shiga Dap KNG de tsun ai re.
Dai re majaw nlung ga jak rung hpe pat kau ya na matu jak rung makau nga ai ginra masha 100 jan gaw mungdaw hkringmang daju hpang de laika bang hpyi shawn mat wa na re lam tsun ai re.
Nlung ga jak rung nnga shi ai shaloi ginra masha ni Nmai Hka kaw yawng wa ai hpun ni hpe sai la nna jai lang ai raitim, ndai nlung ga jak rung a majaw lam pat mat nna bungli nbyin mat ai lam tsun ai re.
Ndai lam hte seng nna Chiphwi uphkang salang Slg. Myint Swe hpe KNG shiga dap phone hte matut mahkai san yu tim alak mi htai ya ai lam n galaw ai re.
Nlung jak rung a majaw ndai zawn byin ai 2 ning daram rai sai lam ginra masha ni tsun ai re.