Shiga

Jinghpaw hpyen yen ni dum nta wa lu hkra asuya hte KHCC bawngban

Dum nta wa mai sai mare gahtawng na mung shawa ni nga ai hpyen yen dabang de Asuya lit nga salang ni hte Jinghpaw hpyen yen garum ntum hpung KHCC ni gaw du na August shata praw laman sa du gawan nna hpyen yen ni a ra sharawng lam hpe sa madat na re lam chye lu ai.

Asuya hte Kachin Humanitarian Concern Committee KHCC ni July 24 ya shani Nay Pyi Taw e hkrum zup bawngban ai hta ya dum nta wa magang sai hpyen yen ni hpe garum na lam hte nwa shi ai hpyen yen ni mung dum nta nhtang wa lu hkra galaw mat wa na lam myit hkrum ai hpe chye lu ai.

Dai zuphpawng hta bawngban ai lam hte seng nna KHCC ningtau amu madu -1 rai nga ai Fr. Naw Lat ndai zawn tsun ai re.

“KHCC hku nna gaw JST (Joint Strategy Team) garum ai hte shangut da ai rapid need accessement report hpe sa jaw ai. Anhte sawk sagawn ai hte hpaji jaw ai lam hpe tsun nna asuya a bungli galaw committee hte bawngban nna hpyen yen ni a ra kadawn lam hpe garum mat wa na re.”

Dai re majaw du na August shata kaw nna dum nta wa magang sai hpyen yen ni a matu malu masha, lanam ta arung arai hte jawng ma ni a ra kadawn lam ni hpe garum mat wa na lam tsun ai re.

Asuya gaw mungdaw kata hpyen yen dabang ni hpe dawm kau nna shara bai jahkrat na masing nga ai majaw dum nta nwa shi ai hpyen yen ni hpe mung wa lu hkra shakut nga ai re.

Dai majaw mungdaw asuya hte Myen hpyendap dingdung daw daju M-P-Hk jawm lata tawn ai gahtawng 24 na mung shawa ni nga ai dabang de sa du nna shanhte a ra sharawng lam hpe shawng ningnan madat na rai nga ai.

Bai nna asuya a ‘shara bai jahkrat na hte hpyen yen dabang dawm zai ninggawn’ hpe Jinghpaw mungdaw hte htap htuk manu hkra ka lajang lu na matu wunpawng mungdan shanglawt hpung KIO hte ginra daju wuhpung wuhpawng ni a hpaji jaw lam hpe August shata praw e Asuya hpang de sa ya na lam chye lu ai re.

Ya ten asuya dap hte wunpawng mungdan shanglawt hpung KIO lapran gap hkat jahkring ai lam nlu galaw shi tim, Myitkyina-Manmaw lam ntsa gahtawng nkau gaw dum nta wa magang sai re.

Raitim mungkan garum ntum hte asuya a gawn lajang ai hpe nhkrum ai majaw yak hkak hkrum nga ai lam tsun ai re.

Related Articles

Leave a Reply

Your email address will not be published. Required fields are marked *

Back to top button