Category Archives: Shiga

Shiga

KSPP Pati asak matut hkra, Myen Hpyendap npu mying jahpan bang na matu dawdan

Leave a comment

Kachin State People’s Party KSPP gaw, daru magam zing da ai Myen hpyen dap ndau da sai hte maren, Pati asak matut lu hkra matut galaw sa mat wa na matu myit hkrum daw dan dat sai lam chye lu ai.

February praw 2 hte 3, lahkawng ya galaw ai, No. (2) lang na Pati hkrum ra zuphpawng hta, KSPP Pati hpe, Myen hpyen dap daru magam zing kau ai hpang bai hpaw shabawn da ai Ra lata poi Commision hta mying jahpan bai bang na matu daw dan ai lam Pati a ningbaw ningnan Slg. Nshang San Awng gaw RFA Jinghpaw Nsen lamang hta tsun da ai re.

“Ralata poi ni hpa n myit shi ai, bungli langai galaw yang သက်တမ်း htum yang သက်တမ်း bai တိုး ai dai သဘော sha re. Da sang grai wa စီးရုံးရေးဆင်း ai lam ni gaw hpa n galaw ai, myi na Party mung masa hku sha matut sa na hku na သက်တမ်းတိုး dat ai sha re. Ra lata poi hte seng na gaw anhte hpa mung rai n myit shi ai, သက်တမ်း ngu gaw Asuya galai wa shagu galoi ma bai galai ra ra re baw nga taw nga ai. Party hpe nan gaw anhte n a yai kau ai sha bai jahkrung da ga ngu ai madang hku re” nga tsun ai re.

Lahkawng ya galaw ai Pati hkumra hpawng hta, ningbaw galai gachyai sai rai nna, Pati ningbaw Dr Manam Tu Ja a shara hta, Slg. Nshang San Awng galai wa ai re lam chye lu ai.

Mung masa pati ni hkan sa ra ai tara upadi hpe Myen hpyendap gaw lai wa sai January 26 ya shani ndau dat sai re.

Tinang mungdaw kata hta, tinang amyu yawng hpe gawng malai tai lu ai mung masa pati langai nga ging nga ang ai the, rawt malan ai ni mung rawt malan magam bungli hku shakut na, mung masa pati galaw ai ni mung nga ra ai lam hte seng na Slg. Nshang San Awng gaw RFA Jinghpaw Nsen hta ndai zawn matut tsun da ai re.

“ Shara shagu gaw tinang myusha bungli lam yan galaw na matu sha re. tinang ding gyeng bungli galaw na nga yang Party ထောင် na lam mung n nga ai, hpyen dap hte pawng mat wa na lam sha nga ai. ya anhte hpyen dap hte mung tsep kawp n pawng ga ai re. re majaw gaw, anhte gaw anhte a mungdaw kaw yawng a gawng malai tai lu ai party langai nga ra ai. nga taw nga ai hpe mung anhte a lata hte ayai kau ai hku n galaw ai, dai hku na tsap na, rawt malan ai ni mung shan hte lagaw hte shan hte amyu sha lam yan hpe shan hte jin ai hte shakut, anhte mung lu shakut ai ram shakut ga ngu mayu ai.” nga tsun ai re.

Mungshawa ni hpe sat nat ai Myen hpyendap woi galaw hkyen ai ra lata poi hpe tsep kawp ninghkap na matu, Myen mung kata rawt malan hpung law malawng ndau ai lam galaw hpang nga sai re.

Wunpawng Mungdan Shanglawt Hpung KIO chyawm gaw Myen hpyendap a 2008 gawda tara npu byin pru wa ai mungmasa pati hte laknak lang wuhpung ni hpe Hpyen hku nna masat ai lam, Kachinnet hta ndau ga lai was ai re.

Majan Shiga, Shiga

KIA Dap ba 9 npu dap dung 6, 26, 44 shara ni hta Myen hpyendap hpe kalang ta htim gasat

Leave a comment

Nawng Lut, Kamaing ginra hkan na Myen hpyendap shara 4 hpe Wunpawng Mungdan Shanglawt Hpyendap KIA Dap Ba 9 ni dai hpawt maga kalang ta sa htim gasat ai lam chye lu ai.

Nawng Lut Ginwang, Sezin mare makau Shwe Twi ngu ai Myen hpyen dap shara, Namlik Hka makau na SNA dap, Kamaing Myen hpyen Byuha kawng, Nam Sheng Myen hpyen dap ni hpe Wunpawng Mungdan Shanglawt Hpyen dap KIA Dapba 9  ni sa him gasat ai re lam chye lu ai.

January 26 ya jahpawt jau hkying 4 chyen daram aten, Seng Zin mare makau Myen hpyen dap hte Samhkyeng SNA dap ni pawng hpawm na nga ai Shwe Twi dap hte, Namlik Hka makau na SNA dap ni hpe KIA Dung 26 dap ni sa htim gap gasat zing kau lu ai lam shawng lam hpyen shi sawk ni kaw na chye lu ai.

Dai shara sa htim gap gasat ai hta, sinat laknak machyu pala alaw alam zing la lu ai rai nna, lahkawng maga kade daram sum machyi ai ngu hpe gaw tup hkrak n chye lu ai re.

Matut nna, Kamaing Myen hpyen byuha kawng hpe KIA Dapba 9 n pu Dung 44 ni laknak kaba ni hte sa htim gap ai hpang, lahkawng maga gasat gala byin wa ai lam chye lu ai.

Dai hpawt manap jau hkying 4 ram aten sa htim gap gasat wa ai rai nna, lahkawng maga sum machyi lam nga n nga re hpe gaw a tsawm tup hkrak n chye lu ai.

Kamaing Myen hpyen byuha dap a dap lakung langai rai nga ai, Nam Sheng mare kyuhpyi bum hta dap jung taw nga ai Myen hpyen dap ni hpe mung dai hpawt manap hkying 6 ram ten KIA Dung 44 hte PDF pawng hpawm dap ni sa htim gap gasat wa ai lam nga ai re hpe ginra masha ni kaw na chye lu ai.

Dai Nam Sheng Myen hpyen dap hpe sa htim gap gasat wa ai rai yang, mare yawng nat jahten kau ya na lam, Myen hpyen dap gaw mare salang hte nawku hpung ningbaw ni hpe tsun shadut da ai mabyin nga ai majaw, ya ten ginra mung mare masha ni myit tsang taw nga ai  chye lu ai.

Hpakant lam shara shagu hta majan byin wa ai majaw, dai hpawt manap jau Myitkyina Hpyen n bungli pa hta n bungli shamu shamawt wa ai lam ni nga wa ai re hpe Myitkyina Maw Hpawng ginra masha ni tsun dan ai re.

Wunpawng Mungdan Shanglawt Hpyen Dap KIA Dap ba 9 n pu hta, Dap Dung 6, 26, 44, ni lawm ai rai nna, dai dap dung ni yawng kalang dat majan hpaw wa ai lam mung rai nga ai.

Shiga

Roi rip sat hkrum ai saranum yen a mabyin, tara rapra hkra matut shakut na matu, Jinghpaw amyushayi hpung 14 ndau laika shapraw

Leave a comment

KBC laika hpaji sasana magam gun saranum yan roi rip sat hkrum ai, Jan 19 ya shani e 8 ning ladu hkrum sai raitim, mahtai kaja n lu shi ai ntsa, matut nna shakut sa wa na matu Jinghpaw mung na Amyu shayi, CSO wuhpung 14 pawng hpawm let n dau laika hte bai shadum wa sai re.

N dai  zawn n dau laika shapraw ai gaw, yawng jawm shakut sa wa na matu, yaw shada ai re lam hpe shim lam a majaw mying n mai lang ai, Amyu shayi hpung lit nga langai KNG hpe tsun ai.

“sara num yen roi rip sat hkrum ai 8 ning hpring ndau laika shapraw ai re. lai wa sai 8 ning kaw nna, n dai amu mang hkang byin ai.raitim dai ni ten du hkra tara rap ra ai lam hpe n lu la ai. Matut na ratimung yawng hkra myit kawp mat ai hku nre sha, tara rap ra ai lam lu la hkra yawng jawm n gun dat na matu ngu yaw shada let n dai amyu shayi wuhpung 14 kaw na, n dau laika hpe shapraw ai lam re”tsun ai.

Sara num yen roirip sat hkrum ai mabyin hta lit nga ai gaw Myen hpyendap re the sakse hte teng man ai lam yawng hpe makoi magap hkum pat kau ai sha n ga, dai ni du hkra, amyu sha ni hpe zing ri roi rip ai hte, shinggyim ahkaw ahkang tawt lai ai lam ni matut manoi wang lu wang lang galaw lu nga ai hpe, madi madun da ai re.

Dum nta masha ni a matu chyawm gaw, Shaning ladu hkrum shagu sha, n ga na, ten shagu, shan hpe a dum  nga ai lam, Saranum Tang Bau Hkawn Nang Tsin a kanu, Jan wahkau Lu Bu ndai zawn tsun wa ai.

“galoi ten du raitim, gade ram na sai raitim, ten tup shanlahkawng hpe myit dum taw ai, shan lahkawng byin ai hpe maroi nni ai. N dai zawn ladaw du ai aten du shagu gaw grau na,lak mi alai nga na, shan lahkawng hpe myit dum ai. Shan lahkawng a matu, masin n si ai. Myit n gut ai lam hpe grau na hkam sha ai. Ya 8 ning hpring mat sai. Raitim anhte teng man ai tara rap ra ai lam hpe n mu tam ai. Raitimung, kade ning mu na na, galoi ten ma du du, n dai tara rap ra ai lam hpe n lu dingsa gaw anhte hku na, myit shayawm kau ai lam nnga ai, rai mat sanu ga ngu na gaw galoi ma myit na n re. galoi raitim tara rap ra ai lam hpe ala nga dingyang rai ng aga ai” nga nna matut tsun ai.

Dai ni du hkra, Sara Num yen hpe zingri roi rip sat kau nna, tara tawt lai ai, Myen hpyendap gaw tara je yang n hkrum ai sha lawt lu lam lu taw ai ngu gaw, baw sang ginra shagu na, amyu shayi ni a myit masin the hkum hkrang shim lam hpe hkra machyi shangun ai the matut hkrit tsang ra nga ai lam myu shayi hpung ni tsun tawn ai.

Dai majaw,  Mungkan madang hku mara kaba nna, matut manoi tara tawt lai nga ai, Hpyendap ningbaw Min Awng Laing hte ningbaw tsang ni hpe rim ahkyak la nna, mungkan tara rung hta tara jawat je yang hkrum hkra yawng jawm shakut na matu, ga saw tawn ai mung rai nga ai.

Teng man ai tara rap ra ai lam lu hkra, myit n shayawm ai sha, Mung chying mung shawa the, seng ang ai Mungdan kata, mung dan shinggan nga ai amyusha wuhpung wuhpawng yawng myit atsam dat ga nga, amyu shayi hpung lit nga Saranum langai n dai zawn matut tsun tawn ai.

“lai wa sai aten hta gaw shinggyim ahkaw ahkang the seng nna Myen mung kaw hpyi shawn na shara nga ai. Ya dai ni gaw n nga sai. Hkrit tsang ai lam gaw saranum yan 2 mabyin sha n rai sai. Kaga mabyin ni mung grai law wa sai. Ndai zawn tara tawt lai ai ni hpe a hkyak la lu na matu gaw Mai gan de nga ai ni, mungdan kata n ga ai ni yawng galaw shakut shaja sa wa ga ngu ga saw mayu ai le”

Sara num yen roi rip sat hkrum ai, shaning ladu hkrum shagu, Ginjaw KBC kaw nna, woi awn let tara rap ra ai lam lu hkra  akyu hpyi ai hpawng lamang hpe shanig shagu galaw wa sai raitim, dai ning gaw, masa lam mayak amyu amyu a majaw nlu galaw sai lam chye lu ai.

KBC laika hpaji Sasana Saranum Maran Lu Ra hte Saranum Tangbau Hkawn Nan Tsin yan gaw, Laiwa sai 2015 ning January 19 ya shana, Mungmau Ginwang, Kawnghka mare hta zing ri zing rat mazut roi rip sat kau hkrum ai rai nga ai law.

Shiga

Ra lata poi matu, hpyen yen ni hpe mying jahpan hta taw sai

Leave a comment

Myen hpyen dap gaw Ra Lata Poi a matu, Myitkyina mare kaba kata na, hpyen yen dabang ni hta mying jahpan lahkawn ai lam galaw hpang nga sai re.

January praw 9 kaw nna 30 ya du hkra, hpyen yen ni a mying jahpan hta ya na matu, Myen hpyendap gaw hpyen yen lit hkam komiti ni hpe shaga la nna, matsun tawn ai re nga, Myitkyina hpen yen mung shawa langai KNG hpe n dai zawn tsun ai re.

“Camp komiti ni hpe shaga nna, shanhte hta shangun ai masa re. ya n kau camp ni gaw hta taw nga ai. hta ngut sai ni nga ai. Camp komiti ni gaw, hkrit tsang ai lam ni mung nga ai ga rai nga ai. Myitkyina kaw gaw, dai ni hkan kaw na, tsawm ra mi garu wa malu ai. lawk salang ni masha jahpan grai hkan hta nga masai.”

Lai wa sai 2020 ning ra lata poi hta asak 18 ning hpring sai ni hpe sha mying jahpan hta ai raitim, ya kalang gaw dum nta masha yawng a mying jahpan hpe hta shing gyin taw nga ai re lam chye lu ai.

“htinggaw jahpan hta dum n ta masha marai 6 nga yang, marai 6 the na jahpan yawng hpyi ma ai. maning hkan gaw 18 ning lahta rai nga. Ya dai ning gaw n ta masha nga manga, ma hkra hpe ka bang shangun ai hku re dai shai taw nga ai. dai majaw anhte ni gaw, n bang na ngu tim, hpa mi nga nga shanhte a lata kaw nga taw ai re majaw, jahpan gaw shanhte kaw du mat ai ka rai nga ai. myit hta gaw npyaw ai le.”nga nna hpyen yen mung shawa langai tsun ai re.

Myitkyina, Woimaw hpyen yen mung shawa ni hpe n dai zawn mying jahpang bang shangun nga sai raitim, Chyihpwi, sadung ni the lahta Sammung hkan na hpyen yen ni hpe gaw, mying jahpan rai nhta shi ai lam chye lu ai.

  Myen mungdan a kaga ginra hkan e, hpyen dap a ra lata poi hte seng nna, ninghkap ai lam ni, Laika shapru ndau ai lam ni, ahkyak la ai lam ni, ta tut bungli galaw ai masa raitim, Jinghpaw mung e gaw ra lata poi a pyaw sha byin tai hkra, Myen hpyendap hku nna, ja ja shakut nga ai masa rai taw nga ai re chye lu ai.

lamu ga, Shiga

Dingsing Pa hta KIO ga sau htu hkyen ai hpe Ginra masha ni ning hkap

Leave a comment

Wunpawng Mungdan Shanglawt Hpung KIO asuya ahkang hte N Ba Pa, Dingsing pa ginra hta ga sau (Rare Earth) htu shaw ai lam hpe tsep kawp jahkring kau na matu, ginra masha ni shawa n gun madun let ning hkap nga ma ai re.

Dai ni, January 16 ya shani kalang bai, Manmaw ginwang, N Ba Pa, Dingsing Pa ginra mung shawa yawng marai 200 Jan shanglawm let, Ga sau htu shaw na matu galaw nga ai bungli dabang shara hta nan sa let, shawa n gun madun ning hkap wa ai lam chye lu ai.

“Dai ni gaw, Hpyen yen na ni mung tsawm ra mi lawm ai, KBC gaw Manmaw ginwang ningbaw wa ma lawm ai. Manmaw Jau ginwang ni ma lung wa ai. Nmawk Jau ginwang ni ma sa ai. Ban hkak Jau ginwang ni ma sa ai. KIO gaw lu galaw hkra gaw ngu ai da raitimung gara hku byin wa na atsawm n chye ai.” nga nna Dingsing Pa ginra masha langai KNG hpe tsun dan ai re.

Lai wa sai bat 6 ya, January 13 ya shani hta mung, ginra mung shawa 200 jan, shawa n gun madun wa sai rai nna, dai ni mung kalang bai, Buga hpung ningbaw ni, hpyen yen mung shawa ni, mare masha ni yawng marai 240 Jan hte, Kalang bai shawa n gun madun ninghkap ai re lam chye lu ai.

Dai sha n ga, n dai ginra ni hta, Ga sau htu shaw ai lam tsep kawp jahkring ya na matu, KIO Ginjaw rung de mung, ninghkap laika bang ai lam nga ai hpe chye lu ai.

Ga sau htu shaw ai lam gaw, tu matu hkrung mahkrung hpe hten za htum mat shangun mai ai majaw, dai masing hpe tsep kawp jahkring lu hkra ninghkap ai re nga, Dingsing Pa ginra masha langai KNG hpe matut tsun ai re.

“ya n dai hpe gaw, kaja wa nan ninghkap lu hkra galaw na matu, anhte ni gaw dai hku na nan, myit tawn da sai re. n dai gaw n kaja ai re yawng hkra chye ai. Dai ni anhte asak aprat kaba sai ni chyawm shi hkrai shi lai mat sai rai. Woo anhte kashu kasha ni a matu, galu gaba hkra sa wa na lam hta dut dang wa ai lam law law byin ai majaw, buga masha ni, gai dawng gai da ma hkra gaw, mung shawa yawng, nga yak jam jau wa ai baw re ngu ai hpe yawng chye na hkrawn hkrang mat ai re majaw, Dai ni n dai zawn rai ninghkap nga sai ka re.” tsun ai re.

N dai lam hte seng nna, KIO Ginjaw shiga dap lit hkam, Du kaba Nhpang Naw Bu hpe KNG kaw nna, Ph the matut mahkai san ai shaloi, Sinpraw ginwang ginjaw de na mung, Jahkrup bawng ban nga dingyang re majaw, dai ngut yang she ginjaw de du na re majaw, dai ni du hkra gaw, hpa mahtai n lu shi ai lam sha tsun wa ai re.

Mai Ja Yang hte Loije Lam lapran na, Gau Ri krung hta mung, ginra masha ni hpyen yen mat ai hpang ginra lamu ga hpe KIO hte miwa Lauban Company ni Ga sau htu shaw sha kau sai re.

Ya matut nna mung, N Ba Pa, Ding Sing Pa ginra hta Gau sau htu shaw na matu Lamu ga htu chyam ai lam ni, ginsum gap da ai lam hte Arung arai yawng htaw sa da nna, Ga Sau htu sana Ri Ri rai nga sai majaw, Ginwa masha ni mung, Shawa n gun the Ja Ja ninghkap wa ai lam rai nga ai.

KIO gaw, Dingsing Pa ninghtawn kata kaw, Ga sau htu shaw ai lam malawng galaw na matu gya nga ai sha n ga, Sadung bum ninghtawn hte Bum sen bum de mung Ga sau htu na gya wa ai lam ni nga taw sai nga, Ginra masha ni tsun ai re.

Mungshawa kam hpa ai KIO asuya kaw nna, Mungshawa makam yawm hkra n galaw ging ai zawn, mung shawa n sen hpe madat nna, Asuya bungli hkrak tup galaw ging ai lam Kachin CSO wuhpung langai hta shamu shamawt bungli galaw nga ai mung shawa langai gaw shi a ningmu hpe n dai zawn tsun ai re.

“Anhte buga mare masha ni a, Opinion (Ningmu) ni hpe mung hkungga ging ai ngu mu ai. Mungshawa myit makam yawm magang, anhte a asuya magam bungli ni yawm magang rai na, Asuya langai ngu ai gaw, Mungshawa hpe makawp maga na matu, Mungshawa hpe madi shadaw na matu, nga ai asuya rai nga ai the maren dai magam bungli ni hpe mung manu shadan, mung shawa hpe mung manu shadan hkungga la ra rai nna, Mungshawa n sen hpe atsawm sha madat nna, htap htuk ai hku hparan hpareng galaw mat wa jang gaw, grai htap htuk na re ngu tsun mayu ai.”

KIO uphkang ginra, Sinpraw Ginwang Ginjaw, Manmaw- Mai Ja Yang- Loije- N Ba Pa, Ding Singpa ginra ni hta, KIO asuya hku nna, Miwa Lauban Company ni law law hpe jashawn let Ga su htu shaw nga ai gaw 3 ning jan wa sai rai nna, ya kalang bai Dingsing Pa ninghtawn kata, matut htu shaw na hkyen nga ai lam rai nga ai law.

Shiga

A Nang Pa hta Si Hkrum ai Nta masha ni hpe US du Hpunau Hkang ni dollar Sen mi garum

Leave a comment

Hpakant KIA Dapba 9 Ginra A Nang Pa e, October 23 ya shana Myen Hpyen dap Jet nbung hte bawm wa gap ai majaw si sum mat wa sai mung shawa dum nta masha ni hpe garum jaw na matu maigan mung dan USA kaw nga ai Chin Baptist Churches Hpung masha hpu nau Hkang ni gaw US $ 100,000 garum jaw wa sai lam chye lu ai.

December 16 ya shani Chin Baptist Churches ginjaw rung hta KBC USA na lit nga ai ningbaw ni hpe ap jaw ya ai lamang hte galaw wa ai re lam KBC USA na lit nga ai Salang Usa Rev. Maw San gaw KNG shiga dap de ndai zawn tsun ai.

“Lai wa sai Oct 23 ya shani anhte myusha ni hta mayak kaba langai hkrum wa sai hpe hpu nau hkang ni gaw myit yawn hkyen lawm n’na garam shingtau mayu ai lam KBC USA de tsun shana wa ai lam nga ai. gara hku mai garum ai ngu hpe bawng ban ai lam galaw ai. Dai hta shanhte hpung masha kata hta alu jawm bang ai lam hpe galaw ngut n’na anhte hpe ya na zawn  jaw bang ai lam re.”

Chin Baptist Churches rai nga ai Hkang hpu nau ni gaw ya na zawn ja gumhpraw garum ya ai hta, Jinghpaw mung hta mung shawa tsa lam si sum mat ai mabyin hpe maroi nni yawn hkyen lawm ai hte gara shara kaw du tim Wunpawng hte Hkang hpu nau ni gaw Kahpu Kanau zawn makyit sumri hpe matut shangang shakang na matu galaw re lam mung chye lu ai.

Ndai ja gumhpraw garum ai lam hta USA kaw na Chin Baptist Churches hpung masha ni sha n’ga mungdan ting na Hkang Hpu nau ni mung dang di lu ai made mi hte shang lawm ai re lam matut chye lu ai.

Ja Gumhpraw hkap la da sai KBC USA ning baw ni mung Myen mungdan de ten dep lawan ai hku shalai mat wa na lam KBC USA na lit nga ai Salang Usa Rev. Maw San gaw matut tsun da ai.

“Anhte hku na mung myen mungdan de du hkra shalai mat wa na re. Du hkra shalai mat wa na matu mung kata lam jahkrup da sai. Kaja wa nan ta tut hkrum sha mat wa sai ni a lata de du hkra shalai mat wa na re”tsun ai re.

Hkang hpu nau ni hku n’na Ja gumhpraw garum ya ai lam hta shawng ning nan lang garum ya lam nre sha shawng de mung lang the lang lam amyu myu hta garum jaw ya lai wa sai rai n’na, shawng lam hta mung Hpu nau Hkang ni hte mahkri shawn hkra nga mat wa na re lam matut tsun da ai.

Lai wa sai Oct 23 ya shana myen hpen dap gaw A Nang Pa shara hta mung shawa law law zup hpawng nga ai ten Jet nbungli 3 the bawm wa jahkrat ai majaw mung shawa tsa lam si sum hkala ai lam byin lai wa sai.

Shiga

Myitkyina, Shingnan Balik dap gap hkrum nna, Balik 2 hkala

Leave a comment

Myitkyina, masat (5) lahta tsang jawng makau na shingnan balik dap hpe, mana aten, Mung Shawa Makawp Maga Dap PDF ni  sa htim gap wa ai hta, Myen hpyen balik marai 2 hkala hkrum wa ai lam chye lu ai.

Mana November 21 ya shana 7:00 PM ram aten hta,  KPDF dap ni hku nna, 40 mm လက်ထောက် si hte sa gap bun ai hpang, sinat kaji ni hte matut gap gasat hkat wa ai re lam ginra masha ni kawn chye lu ai.

Dai zawn, gap hkat ai ten hta, Myen hpyen balik marai 2 hkala sawng wa ai rai nna, shan lahakwng hpe ya ten Myen hpyen tsi rung kaw tsi tsi taw nga ai lam ginra masha ni matut tsun ai.

Dai zawn Myen hpyen balik dap sa gap gasat hkrum ai hpang, Myen hpyen dap ni gaw, hpri gang mawdaw 5 ram hte rau, laga hpyen mawdaw ni hte yan ganawn hkawm wa ai lam matut chye lu ai.

Matut nna mung, gap gasat hkrum ai lam hte seng nna, muklum kata hkan tam sawk jep hkawm ai lam ni mung galaw nga ai lam matut chye lu ai.

Myitkyina muklum kata hta Myen hpyen dap gaw, PDF ni a kasat nhkrum hkra, laja lana rim jep nna, shara shagu azin ayang yu sin taw nga ai ten hta, ya na zawn kalang bai gap hkrum ai lam mung rai nga ai.

Majan Shiga, Shiga

Myen hpyendap ni Mungshawa nga ai mare de laknak kaba gap bang

Leave a comment

Mungmyit Sinli Ga, Muse lahta Mungbaw, Wing Seng mare hta Myen hpyen dap ni n dai laman shana shagu laknak kaba gap shadam bun ai majaw, ginra masha ni hkrit tsang taw ai lam chye lu ai.

November 21 ya shana, Wing Seng Sama kawng kaw na gap dat ai laknak kaba si gaw Hka Nan lawk na maran n ta wa hkrak hkra ai majaw, dum nta masha ni hkala hkrum wa ai lam chye lu ai.

“Myen hpyen dap ni n dai lahkawng masum ya shana shagu laknak kaba gap shadam ma ai, Ying La Bum kaw na mung, Sama bum kaw na mung gap shadam dat dat rai ma ai, mana gap dat ai laknak kaba si langai Hkanan lawk na Maran n ta wa hkrat ai, n ta mung hten nna, Maran ding gai mung hkala hkrum ai, dai zawn laknak kaba hkrai gap shadam bun na anhte mung shawa ni hkrit na pyi n lu yup ai” nga tsun dan ai re.

Dai ginra hta Myen hpyen dap ni shamu shamawt ai lam grai wa n nga ai raitim, bum kaw na laknak kaba gap bun bun re lam ni ding yang byin taw ai lam chye lu ai.

Ya ten dai ginra hta, Myen hpyen dap hte KIA, MNDAA dap ni lapran hpyen masa yu maram hkat taw ai rai nna, lai wa sai bat hta mung, Mungbaw Mai Hpang Mare hta majan byin wa sai re.

Majan Shiga, Shiga

Hpungkyi Jawng kaw Makoi Rawng Nga ai Myen Hpyen Dap ni, Laknak kaba hte gasat hkrum

Leave a comment

Hpakan Gwi Hka mare makau na Sap Pya Chaung mare a Hpungkyi jawng hta Myen hpyen dap ni wa du shara jahkrat nga ai ten, Wunpawng Mungdan Shanglawt Hpyen Dap KIA ni, November 17 ya jahpawt 7 chyen daram aten hta laknak kaba 2 lang gap bun nna, Myen hpyen dap maga si hkala hkrum wa ai lam chye lu ai. Continue reading Hpungkyi Jawng kaw Makoi Rawng Nga ai Myen Hpyen Dap ni, Laknak kaba hte gasat hkrum →

Shiga

Muse ginra Myen Hpyendap Laknak Gap Bun ai majaw, Mungshawa ni Si Hkala hkrum

Leave a comment

Munggu kaw nna yu wa ai Myen hpyen hpung ni hpe Dingdung daw pawng hpawm dap ni, lam lapran bawm hte hkap shing la gasat dat ai hpang, Myen hpyen dap ni makau grup yin de laknak gap shadam bun ai majaw, mung mare masha langai si nna, langai hkala hkrum wa ai lam chye lu ai.

Dai na maga de hkying 1 chyen daram aten, dap shara galai na matu Munggu kaw na yu wa ai hpyen hpung ni hpe, Muse 105 mile kaw nna Chyin San Chyaw maga de yu wa ai lam lapran hta bawm the hkap gasat ai hpang, Myen hpyen dap ni gap shadam bun ai laknak a majaw, mawdaw gram taw ai mung shawa langai si nna, langai hkala hkrum wa ai lam mung rai nga ai.

Dai zawn hkap shing la gasat ai hta Myen hpyen dap maga de na sum machyi si hkala ai lam hpe a tsawm tup hkrak n chye lu shi ai re.

Dai hkala hkrum ai Mung shawa gaw ya ten, Muse mung shawa tsi rung hta tsi tsi hkam la taw ai lam chye lu ai.

Dai ginra mayan ni hta Myen hpyen dap, Pyi Thu Tsit dap, hte rawt malan hpung ni rai nga ai KIA, SSPP, TNLA, MNDAA dap hte PDF ni ding yang shamu shamawt taw ai shara mung rai nga ai re.