Min Aung Hlaing hte rau Salang Hkyet Hting Nan Mung Miwa Mung hkrun lam de lawm nang mat wa ai lam, Myen Hpyen Shiga lawk ni kaw na chye lu ai.
Miwa Gumsan magam Xi Jinping saw shaga ai hkrun lam hta, Mungdaw madang na Hkringmang daju lahkawng mung hkan nang lawm mat ai lam chye lu ai.
Dai mungdaw hkringmang lahkawng gaw, Sammung daw na hkringmang daju U Awng the Jinghpaw Mung na Salang Hkyet Hting Nan yan re lam chye lu ai.
Ya na zawn Miwa mung hte Jarit rai nga ai, Sammung hte Jinghpaw Mung na Hkringmang daju lahkawng hkan nang lawm ai lam gaw, Jarit mayan na sut hpaga lam the seng na chye lawm ra ai majaw, hkan nang lawm mat ai re nga, Miwa the seng na hkaja taw ai Salang langai gaw KNG de n dai zawn tsun ai re.
“Salang Hkyet Hting Nan hkan lawm mat ai ngu gaw, lawm ging ai majaw rai nga ai. Hpa majaw nga yang, Jinghpaw mung kaw Miwa na Project grai law nga ai le. Ndai ni hpe hkrang shapraw galaw mat na matu gaw, Jinghpaw Mung hkringmang nan chye lawm nna, dai hpe bungli shabyin ra ai majaw rai nga ai,” nga tsun ai re.
Ndai kalang na Min Aung Hlaing woi awn ai Miwa mung hkrun lam gaw, June 15 ya shani kaw na 19 ya shani du hkra nhtoi 4 ya na ai hkrun lam re hpe chye lu ai.
Dai hkrun lam hta Min Aung Hlaing wa gaw, Miwa gumsan magam Xi Jinping, Hkringmang Daju Li Qiang hte kaga lit nga ai Asuya Hkringmang ni, Sut Hpaga hpung ni the hkrum bawngban mat na lam nga ai hpe chye lu ai.
Myen Hpyen asuya maga ndau da ai lam hta htingbu mungdan lahkawng Simsa myithkrum let, mungdan galu kaba lam the seng na jawm bawngban mat na rai nna, kaga Sut Hpaga ginlen ai lam ni hpe grau shatsaw sharawt mat na lam ni re nga, tsun ndau tawn ai hpe mu lu nga ai re.
Miwa gaw, Jinghpaw mung kaw shi galaw na bungli masing kaba masum nga ai hpe mu lu nga ai re.
Dai bungli kaba masing ni gaw, Mali Nmai Zup Myihprap wan Madim masing, Namjim Jak rung kaba masing, Miwa India Lido lam nmaw kaba waw masing ni rai nga ai re.
Miwa Mungdan Gumsan Magam Xi Jinping hte Ameracan gumsan magam yan hkrum jahta ngut ai hpang, Russia gumsan magam wa mung Miwa mung de sa hkrum jahta ngut ai hpang, Miwa gumsan magam wa nan Dingdung Korea de sa du nna, Kim Jung Unn hte hkrum ngut ai hpang, ya na zawn Myen mung hte bai hkrum na matu byin wa ai lam re nga, mung masa yu maram ai ni tsun da ai re.
“Min Aung Hlaing wa hpe kaga Mungdan law malawng kaw na hkapla masat masa galaw ai lam nau n nga ai le, dai majaw gaw shi hpe hkapla masat masa galaw ai mungdan ni hte htinglu htinglai nna, shi a magam ngang grin na matu shakut taw ai ga rai nga ai.” Nga tsun ai re.
Ndai kalang Min Aung Hlaing wa Miwa hte hkrum ngut ai hpang, Jinghpaw mung kaw Miwa asuya galaw na matu hkyen da ai bungli masing shara ni de majan grau na laja wa na masa nga ai lam n tsa na salang wa matut tsun maram da ai re.
