Washawng Ninghtawn kata, Nga dumsu ni hpe majoi dat shaprang na rem ai hku n galaw na matu lit nga ai uphkang rung na ndau ai rai tim, Mung shawa ni hkan nang hkan sa ai lam n nga ai majaw, ninghtawn na lit nga ai ni ahkyak la ai lam nga wa ai hpe, ginra masha ni tsun shana wa ai re.
Washawng mare makau grup yin kaw Dumsu dat shaprang ai lam n galaw ai sha tinang dumsu nga ni hpe a tsawm gau sharawng nna, rem na matu seng ang ai Ninghtawn rung na tsun da ai re.
Dai zawn ninghtawn rung na tsun ndau ai hpe mare mung shawa ni hkan sa ai lam n nga ai majaw, Ninghtawn salang ni mung shawa dumsu nga hpe gap sat ai mabyin lam ni nga lai wa ai hpe chye lu ai.
Washawng mare kaw dumsu nga law ai majaw, hkawm sa hkawm wa mayak byin hkrum ai lam hte seng na ginra amyu shayi KNG Shiga de n dai zawn tsun dan ai re.
“Washawng Mare gaw, kaga mare hkan na hta lai lai rai law ai re. dumsu nau prang ai majaw, Mawdaw lam hkan hpum ayai taw, gau yang mung bai n hprawng rai hkawm sa hkawm wa ni yak wa ai majaw, lit nga ai ninghtawn rung na ni gaw, tinang Nga Dumsu hpe gau ga gau ga nga rai nga ai, rai tim nkau gaw n gau, n kau gaw gau, gau tim tang n du, Ninghtawn rung na ni gaw dumsu lawng galaw nna, dai kaw gau sharawng zing kau ya nna, dam gayet ai lam ni galaw yu ai rai tim, madu n pru ai ni bai byin re majaw, gap sat ai madang du wa ai re ngu mu ai law,” nga tsun ai re.
Washawng mare gaw, hpyen masa hta ahkyak ai mare langai sha n ga, Kanpaiti, Chihpwi, Ngagyang de lung ai lam numbraw shara langai mung rai nga ai
Washawng mare hpe lai wa sai 2024 ning March shata daram hta KIA maga shalawt da lu ai mare kahtawng langai rai nna, ya ten dai mare hta Hpaji jawng ni hpaw nna, Mung Shawa law malawng galaw lu galaw sha nna, naw nga taw ai mare kahtawng re.
Ya ten dai mare de majan byin ai lam n nga tim, makau grup yin hkan na mare rai nga ai Mukchyik Lamyang mare ni de gaw laknak kaba jahkring hkring hkrat bun ai lam ni nga ai hpe chye lu ai.
Myen hpyen dap maga na gaw, Waimaw Ginwang yawng hpe bai htim gasat zing madu na matu Jamga Nawnghkyi mare ni hta Hpyen n-gun mahkawng nga ai lam Jamga mare mung shawa ni tsun ai re.
Myen Hpyen dap hte Miwa asuya myit hkrum nna, Miwa Project bungli ni bai hpang wa ai rai yang, KIA gasat zing tawn ai Kanpaiti Washawng lam gaw yawng bai yen kau ya ra na masa nga ai lam, mung masa yu maram ai ni tsun tawn ai re.
