Shwegu Sitar Mare Kaw Nbungli Bawm a Majaw Mung Shawa Marai 3 Si Hkrum
Shwegu ginwang Sitar mare kaw Myen Hpyen nbungli bawm sa jahkrat bun ai majaw, mung shawa marai 3 asak si hkrum wa ai lam ginra masha ni kaw na chye lu ai.
Dai hpawt manap hkying 7 aten daram hta, Jet Nbungli langai dai grup yin kaw masum lang pyen gayin nna, bawm jahkrat bun kau da ai hta, Sitar mare na Ninghtawn tsi rung hpe shading nna, jahkrat bun da ai re lam ginra masha langai KNG shiga de n dai zawn tsun dan ai re.
“Nbungli bawm wa jahkrat bun ai majaw, marai 3 si ai langai gaw Salang kaba re nga ai. marai lahkawng kun gaw hkala sawng ai,Dai makau hkan na n ta yawng hten ayai mat ai ga rai nga ai, Myen ni ndai laman dai maga de ding yang စစ်ကြောင်းထိုး taw ai rai nga ai,” nga tsun ai re.
Ndai laman dai mare de majan byin ai lam n nga tim, Myen hpyen maga ya na zawn mung shawa tsi rung hpe shading na da sang wa gap ai masa re lam ginra masha ni matut tsun maram da ai re.
Ndai laman Myen hpyen dap ni Shwegu Myo Hla maga de Hpyen tsit kyawng htu taw ai majaw, shani shagu ngu na gasat gala majan byin taw nga ai re.
Dai gasat gala byin ai shara ni de Myen hpyen nbungli hpan hkum shani shagu sa gap bun taw ai lam matut chye lu ai.
Ya majan laja dik shara gaw, Shwegu mare numshang na lam numbraw 5 shara hta shani shagu laja lana gasat poi byin taw ai lam chye lu ai re.
