Shwegu Myen Hpyen dap kata kaw, dai na maga de nbungjawng hte lusha hpyen n-gun wa jahkrat kau da ai lam, ginra masha ni tsun shana wa ai re.
Dai na maga de hkying 5 aten daram hta, Myen hpyen dapjau nbungli langai kaw na, arung arai hte hpyenla ni hpe jahkrat mat ai lam Shwegu ginra masha langai KNG shiga dap de ndai zawn tsun dan ai re.
“Mi hkying 5 ram kaw Myen Hpyen nbungli hte, nbungjawng shakap na arung arai ni jahkrat ya ai, dai kaw lakanak hte hpyenla nkau mung lawm ai nga ma ai, anhte mung grai tsan ai re majaw, jahkrat ai sha mu ai. Shan the dap kata kaw re.Hk.M.Y (602) hte Hk.L.Y ( 56) dap shara lahkawng kaw wa jahkrat kau da ma ai. Dai dap lahkawng gaw yep re sha rai nga ai, Mya she rai jahkrat kau da ma ai,” nga tsun ai re.
Shwegu makau grup yin shara ni hkan shani shagu majan laja lana matut byin nga nna, Shwegu Muklum hpe gaw, Myen ni a tsawm sha lu up madu da ai masa lam re nga, ginra masha ni tsun shana wa ai re.
Shwegu muklum kata Myen Hpyen Dapdung lahkawng jahkrat da nna, ya ten, Mabeing, Nga-Oo maga na hpyen n-gun htu shadut htim gasat ai lam galaw nga ai re.
Myen hpyen htim gasat lung wa ai hta, Myen hpyen maga sum machyi law ai majaw, nbungli the shani shagu wa gap gasat ai lam nga taw ai hpe chye lu ai.
Shwegu ginwang kata Hpyen masa shaja hkat taw ai ya shata lahkawng jan na wa ai the rau, muklum kata lusha nkau dumhprut wa ai lam ni mung nga ai hpe chye lu ai re.
Ya na zawn malu masha dumhprut wa ai majaw, Myen Hpyen nbungli hte wa jahkrat jaw ai masa re lam ginra masha ni tsun maram nga ma ai re.
