Shwegu de htu lung wa ai Myen Hpyen Ni Hte KIA PDF Pawng Hpam Ni Laja Lana Gasat Poi Byin Nga
Nga-Oo kaw na htu lung wa ai Myen hpyen hpung ni hte KIA PDF pawng hpawm dap ni lapran majan laja lana gasat poi matut byin taw nga ai lam shawng lam hpyen magam gun hte ni nawn ai ni kaw na chye lu ai.
Myen hpyen ni gaw, Shwegu de hpyen n-gun jat na matu htim gasat lung wa taw ai hpe KIA PDF dap maga na mung lam lapran laja lana hkap shingla gasat ai majaw, majan shani shagu ngu na ram byin taw ai nga dai ginra na KIA hte ni nawn ai Salang langai KNG shiga de n dai zawn tsun dan ai re.
“Ya gaw Nga-Oo, Katha maga de na Myen ni ding yang htu taw ai ga rai nga ai, lam lapran shara shagu ngu na ram majan byin taw ai, grau na laja ai gaw Shwegu du wa mahka na ၅ လမ်းဆုံ ngu ai shara kaw laja lana gasat hkat taw ai ga rai nga ai, Myen hpyen ni Shwegu de lu shang hkra gaw rai n rai shi ma ai. Tsun ga nga yang Katha hte Shwegu lapran kaw anhte de na ni naw lu ninghkap shingla gasat taw ai ga rai nga ai,” nga tsun ai.
Ya ten Shwegu ginra lam nmaw kaba ni hpe KIA maga pat tawn ai lam n dau da ai rai tim, Myen ni a tsawm sha lu up hkang tawn ai lam kaba re majaw, hkawm sa hkawm wa mawdaw ni shani shagu ding yang lai hkawm taw ai nga n tsa na salang wa matut tsun da ai re.
Dai sha n ga, Shwegu muklum kaw nga ai mung shawa ni hpe hprawng yen na matu KIA maga tsun sadi jaw da ai rai tim mung shawa yawng hprawng yen ai lam rai n nga ai sha n ga, htam 10 kaw na htam mi daram sha naw hprawng yen ai lam chye lu ai.
Ndai laman Shwegu muklum kata majan byin ai lam kaga hpa laklai ai lam n nga shi ai rai tim, Shwegu shinggan ၅ လမ်းဆုံ shara kaw gaw, shani shagu ngu na ram byin taw ai lam chye lu ai.
Myen hpyen ni gaw, n dai laman Mali hka lam mayan na KIA PDF dap ni hpe jasan kau ngut ai hpang Manmaw de hpyen n -gun sa nna, Manmaw hpe bai gasat na maw ai lam hpyen masa yu maram ai ni tsun da ai re.
Ndai laman Shwegu ginra hpe htim gasat yu na masan n sa jang gaw, ya hka kaba wa ai hte hkrak Mali hka lam hku na Sanghpaw kaba hte laknak malu masha hpyen n- gun bai wa htaw sa na matu mahkrun bai pru wa na masa nga ai lam, hpyen masa yu maram ai salang wa matut tsun maram da ai re.
Ya n dai laman hta mung, lawu ga de na hpyen n-gun mawdaw ni Myen mung dingdung maga de bai man yawng lung wa taw nga ai lam chye lu ai re.
Ndai lam hpe maram yu yang, jinghpaw mung kata de gaw majan laja lana matut naw bai gap gasat wa na masa nga ai lam hpyen masa yu maram ai ni tsun da ai re.
