Mogaung Hka Yawm sai rai tim, Garum Kahtau lam ni matut ra taw nga ai lam, Mung Shawa ni tsun ai.
Mogaung kaw lai wa sai bat kaw na Mungnyang Hka hte Mogaung hka kaba wa ai majaw, Mogaung mare, htam 3 kaw na htam 2 daram re ai mung shawa ni hka hpyen tsin yam hkrum sha lai wa sai re.
Mogaung mare kaw dai hpawt kaw na hka hkyet hpang wa sai rai tim, lamu ga nyem ai hkan na mung shawa nig aw, shat shadu sha rai n mai ai majaw, garum ningtum lam ni matut ra ai lam, ginra mung shawa langai KNG shiga de n dai zawn tsun ai.
“Mogaung gaw Marang kaba htu sai hte hka shang ai daw ni nga ai, Buda Nyaungkai Taw lawk maga de sawng dik rai nga ai, dai hkan na ni gaw aloi hte sha hka n yawm mat na re, hka sha n hkyet mat dingsa gaw, gara kaw n chye sa shadu sha ai le dai majaw gaw grai naw ra na re, yawng jawm garum la ga,” nga tsun ai re.
Hka Hpyen tsim yam hkrum nga ai mung shawa ni hpe Mogaung Buga Nawku hpung kaw na lani mi shat htuk hkying mi jan shadu garan jaw taw ai dai ni hte rai yang, n htoi 4 ya du sai lam chye lu ai.
Mogaung hpyen yen mung shawa hte kaga Hka hpyen tsinyam hkrum ai mung shawa ni hpe dabang Mogaung Nawku hpung ni hte ပရဟိတ hpung ni pawng nna, shat shadu garan jaw ai lam ni galaw nga ai lam matut chye lu ai.
Myen Hpyen Asuya maga na gaw, Wansat Dap na ni hka hkan garan jaw ai hta lai nna, kaga garum ningtum ai hpa n nga ai lam, ginra mung shawa langai n dai zawn matut tsun ai re.
“Myen Asuya maga na sa garum ai gaw hpa mung n mu ai, မီးသတ် ni chyawm lu hka hkan garan ai, ပရဟိတ ni sa jaw ai arung arai hpe garan ya lawm ai dai ram sha mu lu ai, madung gaw Nawku hpung hte alu madu ni mai byin dang di ai hku garum jaw taw ai ga rai nga ai,” nga tsun ai.
Ya ten Mogaung buga hpung wang kata hta masha hkying kaba a matu shat shadu garan ra taw ai majaw, masha n-gun, ja gumhpraw n-gun ni ra matut ra taw ai lam chye lu ai.
Hka Hpyen hkrum ai mung shawa n kau hpe gaw, Hka n du ai shara ni kaw gan htawt sit da ai rai tim, masha grai law wa ai majaw, nga shara dumhprut dumhprat re lam ni nga taw ai hpe matut chye lu ai.
Dai ning hka kaba ai gaw, 2024 hka kaba ai daram rai n kaba lu ai rai nna, dai ning hka kaba ai gaw, Mungnyang hka a majaw, kaba ai re majaw, dai ni kaw na yawm hpang taw sai lam chye lu ai.
Mogaung hka kaba ai shara ni gaw, Nyaung Kai Taw, Myo Oo, Kachin su, shara ni hta sawng wa ai lam chye lu ai.
Mogaung ginra gaw madung Mogaung hka hpe myit tsang ra ai lam matut tsun ai re.
Mogaung hka sha n kaba na kaga hka ni gade kaba wa tim, grai wa n tsang ra ai nga, matut tsun ai.
Dai ning Jinghpaw mung de marang law nna, hka tung hka kaba ai lam ni byin nga ai sha n ga, lam n maw ga sharut gyi ai lam ni byin nga ai hpe mu chye lu nga ai re.
Kanpaiti lam nmaw kaba Lahpai hte Wawhkyung mare lapran na Dumbang hka mahkrai makau kaw Ga sharut gyi ru ai majaw, Kanpaiti lam nmaw kaba pat taw ai lam chye lu ai.
