Wunpawng Mungdan Shanglawt Hpyendap KIA kaw na gan pat da ai Hpakant Lam nmaw kaba hpe dai ni kaw na bai gan hpaw dat ya ai lam, KIA Dapba (9) kaw na matsun laika shapraw da ai hpe mu lu ai re.
Dai matsun laika hta, ndai laman Jawng hpaw ten re majaw, Mungchying Mung Shawa ni Jawng mying bang, lai sa/wa galaw ra ai re majaw, Hpakant lam Maw kaba hpe gan hpaw ya na matu KIA Dung (6) hte (44) hpe matsun da ai lam mu lu ai re.
Hpakant lam hpe n dai laman gan hpaw ya na matu tsun da ai rai tim, n htoi gade ya hpaw ya na ngu hpe gaw a tsawm tup hkrak n chye lu ai re.
“Dai ni kaw na Hpakant lam hpaw sai nga gaw tsun ai, n hpaw tim mung lai ra ai ni gaw ding yang lai nga ma ai, rai tim dai ni kaw na gaw tara shang hpaw sai ga rai nga ai, ya n kau tsun ai gaw n htoi 10 ya ram sha gan hpaw ya na zawn mung nga, laika hpe yu maram yu yang gaw pat na rai yang laika bai shapraw na re ngu maram lu ai,” nga Hpakant ginra masha wa tsun ai re.
Hpakant Myitkyina Nmaw lam kaba hpe Wunpawng Mungdan Shanglawt Hpyendap KIA kaw na lai wa sai April 21 ya shani kaw na pat ai lam n dau da ai rai nga ai.
Hpakant Lam Nmaw kaba hpe Wunpawng Mungdan Shanglawt Hpyendap maga pat tawn ai rai tim, Mung shawa n kau galaw lu galaw sha yak wa ai majaw, KIA Pat hkum da ai lapran hkawm sa ai lam ni galaw wa ai re.
Mung Shawa ni KIA Pat hkumda ai lapran hkawm sa ai majaw, Mung shawa si hkala ai lam ni mung byin lai wa sai re.
Ndai laman KIA maga tara shang hpaw ya ai lam rai n tsun ai rai tim, mung shawa n kau ma ni hpe jawng sa ra ai majaw, tinang ni nawn ai ni the jahkrup nna hkawm sa ai lam ni galaw nga ai hpe chye lu ai re.
Myen hpyen dap gaw Uru ginra na tat sum da ai dap shara ni yawng hpe bai gasat zing madu la lu na matu, Pyithutsit ni hpe n-gun dat let hpyen n gun shani shagu jat lung wa taw ai majaw, ya na zawn lam n-maw kaba hpe pat kau ya ai mung rai nga ai.
Hpakant ginra masha ni hkawm sa hkawm wa yak hkak mat ai sha n ga, Hpakant ginra hta gunrai manu tsaw rawt ai majaw, mung shawa ni a sak hkrung hkawm sa lam hta grai yak hkak wa ai majaw, mung shawa ni lam lawan hpaw ya na matu hpyi shawn wa ai lam mung rai nga ai.
