Mandalay – Myitkyina Lam Maw kaba hpe Rawt Malan Hpung Maga Bai Hpaw Ya

Majan nhpan lam a majaw pat da ai Myitkyina Mandalay Lam Maw kaba hpe rawt malan hpung maga dai hpawt manap kaw na bai hpaw dat ya sai lam, Mawdaw la ni kaw na chye lu ai re.

Jinghpaw Mung hte Sagaing jarit, Mawlu Maw He makau grup yin kaw n dai laman majan laja lana gasat poi byin ai majaw, rawt malan hpung maga, Katha – Indaw Lam Maw kaba hpe bai hpaw dat ya ai rai nga ai.

Katha hte Indaw lapran kaw pat hkrum taw ai Mawdaw hkying mi daram hpe dai hpawt manap kaw na daw hte daw gau ngwi ngwi san jep na shalai ya taw sai nga, Mawdaw la langai KNG shiga de n dai zawn tsun ai re.

“Dai hpawt manap hkying 11 ram kaw na shalai hpang ya taw sai, Mawdaw grai law ai majaw, daw hte daw gau ngwi ngwi jep ra ai ni jep rai na shalai ya taw sai,” nga tsun dan ai re.

Mawlu Indaw hte Katha Lam Maw kaba hpe lai wa sai May 21 ya shani kaw na Myen hpyen ni shawng pat kau ai hpang, rawt malan hpung maga mung pat ai lam bai n dau wa ai re.

Myen Hpyen maga shawng lam pat kau ai majaw, hkrunlam hkawm mung shawa hkying mi jan Katha Muklum kaw wa pat hkrum taw ai mung rai nga ai.

Lam lapran kaw mung shawa ni pat hkrum ai lam hte seng na, Katha kaw pat hkrum ai wa a, n ta masha langai KNG Shiga dap de n dai zawn tsun dan wa ai re.

“Shi gaw Mandalay kaw na Myitkyina de lung wa ai rai nga ai, Nbungli Lekmat mung n lu mari ai majaw, hkam kaja lam n nga tim, Mawdaw hku na wa na nga lung wa ai. shi lung wa ai shaloi gaw majan rai nbyin lam rai n pat shi ai. shan hte Katha du ai hpang shawng de majan byin taw ai nga na Myen ni Katha kaw na n shalai mat ai. dai kaw gaw Num Ma ni mung grai law, lusha mung n lawm yak yak hkak hkak byin taw ai,” nga tsun dan wa ai re.

PDF pawng hpawm ni up madu da ai, Myitkyina – Mandalay mawdaw lam kaba n tsa na Indaw – Naba lam numbraw shara hte Katha – Indaw lam ni hpe Myen hpyen dap April 29, 30 ya shani Myen hpyen dap bai up madu kau wa lu ai rai nga ai.

Dai ginra de Myen hpyen ni bai htu kanaw shang wa ai majaw, majan laja lana gasat poi byin w anna, mung shawa hkying lam man ang ai de hprawng yen taw nga ai sha n ga, hkrun lam hkawm mawdaw ni jahkring hkring pat hkrum ai shara rai nga ai.

Dai ginra gaw, Jinghpaw mung a matu hpyen masa lam hta ahkyak ai shara re ai zawn, Jinghpaw mung a numshang mare kaba ni mung rai nga ai.