Namhpakka Myen hpyen dap Hk.L.Y 123 dap kaba hpe Wunpawng Mungdan Shanglawt Hpyendap KIA kaw nna January 24 shana de hkying 4 daram hta gasat zing madu kau lu sai lam, KIO Shiga Dap Lithkam Dukaba Nhpang Naw Bu KNG shiga dap de tsun ai re.
“Namhpakka Myen hpyen dap kaba hpe e, dai na maga daw hkying 3, hkying 4 lapran daram hta e, tsep kawp zing la lu sai nga na lu ai, kata lam shiga hkum hkum tsup tsup gaw hpa nga nna ai, ginra jasan ngut ai hpang na masa lam mung hpa nga rai nna shi ai,” nga tsun dan ai re.
Namhpakka Myen hpyen dap hpe December 20 ya shani kaw na htim gasat hpang wa ai gaw, shata mi jan na ai hpang, zing kau lu ai re.
Lai wa sai January 14 ya shani hta Namhpakka Myen hpyen dap lu zing madu sai lam shiga pru wa ai rai tim, Myen hpyen dap hkam bawm a majaw, bai hting nut mat ra ai lam chye lu ai.
January 16 ya shani Namhpakka makau grup yin de wa htim gap gasat ai, Myen hpyen Jet Fighter nbungli langai hpe KIA dap maga gap jahkrat kau ya lu ai re.
Dai nbungli gap jahkrat kau ya ai hpang, shani shagu ngu na dai shara hta majan laja lana gap gasat hkat taw nga ai gaw, dai ni dap lu zing la kau ai ten du hkra re lam chye lu ai.
Namhpakka Myen hpyen dap hpe htim gasat ai hta, Myen hpyen dap maga nbungli laknak kaba ni hte wa gap bun ai majaw, Namhpakka mung shawa marai 10 jan asak si sum wa ai lam nga ai hpe chye lu ai.
Dai zawn laknak kaba ni a majaw, Namhpakka mare kata na mung shawa dum nta law law hten za hkrum wa sai re.
