Kamaing Myen hpyendap laknak kaba Majaw, Mungmasha Langai Hkala nna Marai Langai Rim Hkrum
Kamaing Myen hpyen dap kaw na laknak kaba gap shadam bun ai majaw, mung shawa langai hkala hkrum nna, laga ngam ai marai langai hpe Myen hpyen dap rim woi mat ai lam chye lu ai.
January 22 ya jahpawt hkying 10 chyen daram hta Lawa kaw na Kamaing maga de sa wa ai ten, Kamaing Myen hpyen dap kaw na gap shadam bun dat ai laknak kaba si hte hkala hkrum wa ai rai nna, hpa n byin ai salang langai hpe gaw, Kamaing Myen hpyen byuha dap de rim woi mat ai nga dai ginra na mung shawa langai KNG shiga dap de tsun dan ai re.
“Lawa Lagawng mare kaw na, Kamaing de bungli lam hte seng nna sa wa ai kaw, Kamaing Myen hpyen dap gap dat ai laknak kaba si hkra nna, langai hkala ai, langai hpe gaw rim woi mat ai, hkala sawng ai hpe gaw, Myitkyina de sa da ai nga,” nga tsun dan wa ai re.
Hkala hkrum ai wa gaw, Asak 50 ning ram re Slg Nhkum Zau Lawn ma marai (3) a kawa rai nna, Magyi kaw hkala sawng ai majaw, Myitkyina tsi rung de htaw sa da nna, Mare Salang Jangmaw Nawng Lat hpe gaw Kamaing Myen hpyen dap de rim woi mat ai rai nga ai.
January 22 ya jahpawt dai ginra hta majan byin ai lam n nga ai rai tim, Myen hpyen dap maga na jahpawt ting laknak kaba gap shadam bun wa ai rai nga ai.
Myen hpyen dap maga de na, ya na zawn laknak kaba gap shadam bun ai lam ni a majaw, dai ginra na mung shawa ni hkrit tsang taw nga ai re.
