Waimaw Shwe Nyaung Pin Shwe Min Pyithutsit dap hpe KIA dap ni numdaw lahkawng lang sa htim gap gasat ai hta, Pyithutsit maga si hkala ai lam nga wa ai hpe chye lu ai.
Shwe Nyaung Pin lawk 5, Palasatic hpaw galaw ai jak rung makau hta shara jahkrat nga ai Pyithutsit shagyit hpe KIA hte PDF dap ni January 22 ya shani sa htim gap gasat ai hta, Pyithutsit dap maga de na marai 5 si nna, n kau hkala sawng wa ai nga dai ginra na mung shawa ni tsun ai re.
“Dai shara gaw shara jahkrat nga ai Pyithutsit ni shawoi gaw dingla ni sha dung na tawn da ai, ndai laman Myen hpyen dap hte Pyithutsit hpyen n-gun 60 daram bai jat wa ai majaw, sa gap gasat ai, marai 5 si ai nga tsun ai, nkau law malawng hkala na Myitkyina de htaw mat wa ai,” nga tsun ai re.
Dai dap shara hpe January 22 ya jahpawt daw hta numdaw mi, shana maga hkying 5 hte hkying 8 daram hta numdaw kalang mi numdaw lahkawng lang sa htim gap gasat wa ai re.
Myen hpyen dap hte Pyithutsit dap shara gap gasat hkrum shagu, mung shawa ni nga ai shara de laknak kaba ni gap shadam bun wa ai majaw, Shwe Nyaung Pin hte Aung Mye Thit mare na mung shawa n kau hkrit kajawng nna, hprawng yen ai lam ni nga ai re hpe chye lu ai.
Ya na zawn mare kata hta gap gasat hkat wa ai a ntsa mung shawa ni myit tsang taw nga ma ai re.
U Shwe Min Pyithutsit dap ni gaw, ndai laman laja lana hpyen lahkawn ai lam ni galaw taw nga nna, shan hte sa rim woi ai ni n nga yang, nta kaw nga ai ni hpe rim woi mat ai lam ni galaw taw nga ai hpe chye lu ai re.
