Manwin ginra hta nga ai Myen hpyen dap ma hkra hpe KIA PDF dap kaw na yawng htim shagrawt kau sai re.
Manwin mare hta dung ai Myen hpyen dap shara 4 hpe htim gasat zing madu kau ai hta, Manwin Myen hpyen dap, Manwin Balik dap, Jarit pawng hpawm dap, hte Nawng tau mahkrai dap ni hpe htim gasat zing madu ai hta, laknak machyu pala alaw alam lu zing madu nna, Myen hpyen bawng masha mung lu rim da ai lam, KIA Shiga dap lithkam Dukaba Nhpang Naw Bu tsun ai re.
“Manwin Gyi Myen hpyen dap kawng hpe zing ai, Balik dap hpe zing ai, pawng hpawm dap hpe zing ai, Mahkrai pawt na dap zing ai, shara mali hpe htim gasat zing ai, bawng masha n kau lu rim ai,” nga tsun ai re.
Hpyen dap kawng hte Balik dap hpe htim gasat zing madu ai hpang, pawng hpawm shagyit hte jarit dap shara ni hpe bai htim gasat zing madu wa ai rai nga ai.
Ya na zawn Myen hpyen dap shara hpe htim gasat zing ai hta, Myen hpyen bawng masha 100 jan hte laknak machyu pala alaw alam zing madu la ai lam chye lu ai.
Kawng Hkang Myen hpyendap hte Pawnghpawm shagyit na hpyenla marai 57, miwa hkran jarit de hprawng koi yen makoi gyem hkawm nga ai hpe Miwa balik ni kawn bai nhtang wa mat na matu tsun gau ai lam mung nga ai re.
Manwin mare hpe htim gasat zing ai hta, Myen hpyen dap maga de na nbungli hte wa gap ai lam nga wa ai majaw, mung shawa dum nta 2 wan hkru hten mat ai lam nga ai re.
Myen hpyen dap wa jahkrat ai nbungli bawm Nam Hkam mare maga de wa hkrat ang ai majaw, mung shawa marai 2 hkala sawng wa ai lam nga ai hpe chye lu ai.
Manwin mare shingdu Gawng Ngu Kawng Myen hpyen dap hpe mung January 19 ya shani zing madu kau lu sai rai nga ai.
