Wunpawng Mungdan Shanglawt Asuya Ginjaw Ginra Laiza makau grup yin de Myen Hpyen dap si hkam Drone hte bawm wa jahkrat bun ai lam ginra masha ni kaw na chye lu ai.
Mana de Hkying 3 chyen aten hte shana yuptung hkying 11 chyen aten kaw, Sihkam Drone lahkawng lang wa jahkrat kapaw ai nga, Laiza Ginra masha langai KNG shiga dap de tsun dan wa ai re.
“Mana maga de wa hkrat ai wa gaw, Hka Chyang Hkahku maga na Wa Hpang Langai kaw wa hkat ai nga, Mana Yuptung na gaw gara kaw wa hkat ai kun? Yuptung re majaw rawt mung n rawt yu na n chye ai, Masha si hkala ai lam hte, dum n ta hten za ai lam gaw hpa nga n na ai,” nga tsun dan wa ai re.
Myen Hpyendap Si Hkam Drone wa jahkrat ai hta, Lahkawng yan gaw, Alen Bum makau grup yin kaw wa hkrat ang ai rai nna, Masha gadai mung n nga ai shara hta re majaw, gadai mung hpa n byin ai lam chye lu ai.
Laiza muklum gaw, Ya majan byin nga ai, Manmaw hte deng 40 tsan ai shara kaw nga ai shara rai nna, Manmaw de na hpyen lagaw gang ai masa hku Ginjaw shara de Drone bawm wa jahkrat ai rai na masa nga ai lam, Hpyen masa yu maram ai ni tsun da ai re.
“Laiza de Suicide drone wa hkrat ai ngu gaw, Myitkyina Waimaw hkan na shapyen ai sha mai byin ai, hpa majaw nga yang, Manmaw kaw na shapyen na mung n loi ai, ngut na Myitkyina Laiza lam yawng mung KIA gasat zing da ai re rai, Waimaw hkan na shapyen dat ai rai na masa nga ai,” nga tsun maram da ai re.
Manmaw Majan laja lana byin nga ai ten, Dai ning Junuary 24 ya shani hta mung kalang, February praw 7 ya shani hta mung kalang, jahkrat bun wa sai re.
Myen Hpyen dap maga na gaw, dai ning kaw na Suicide Drone ni hpe jai lang wa nna, Rawt Malan hpung ni a ahkyak ai shara ni hpe Drone hte Kinyu hkan yu nna, ya na zaw Suicide Drone hte hkan jahkrat kapaw taw ai lam mung rai nga ai.
Laiza de Cuicide drone wa jahkrat ai ndai kalang hte rai yang, 5 lang du sai lam mung sagawn chye lu ai.