Myitkyina Muklum kata, KIO Salang Kaba lahkawng hpe Myen ni gap sat nna, Mawdaw kaw hta bang mat wa ai nga, ginra masha ni tsun ai.
Dai Salang kaba yan gaw, Hpa-awn Shalat Jawng mast yan -9 hte Masat yan -12 na Salang Kaba Lahtaw Zau Seng Awng the Salang Kba Ngalang Lawt Ring yan re lam chye lu ai.
September 14 ya shana de Hkying 4 aten daram hta Myitkyina San Pya lawk kaw Seng ke hte hkawm nga ai hpe, Myen Hpyen dap ni AD Van hte sa wa nna, lam n tsa kaw nan gap sat kau nna, mawdaw kaw bai hta garawt htaw mat ai lam, Dap Kawng ginra masha langai KNG shiga dap de tsun dan wa ai re.
“ Dai Salang Kaba lahkawng gaw gara de sa ai kun n chye ai, Sengke hte hkawm nga ai kaw Myen Hpyen la ngu maram lu ai ni AD Van hte sa wa nna, sinat gadun hte sa gap sat kau na mawdaw kaw bai hta htaw mat ai, Myen ni mung mungshawa hking hkrai re,” nga tsun dan wa ai.
Ya gap sat hkrum wa ai Salang kaba yan gaw, Kamaing hte Lawa mare na Salang kaba yan rai nna, Myitkyina Ginwang kata bungli ang ai gade nau n na shi ai lam matut chye lu ai re.
Myitkyina muklum kata Mana de dai zawn byin wa ai hpang, dai ni gaw, lam jut shagu hta Myen Hpyen dap ni hkap taw nna, sha hte n tsen n hten ai ni hpe san jep ai lam ni galaw taw nga ai nga tsun ai re.
Myitkyina muklum kata n dai laman lagut damya grau grau law wa ai zawn, ya na zawn masha gap sat hkrum ai lam ni mung jahkring hkring byin nga ai re.