Myen Hpyen Hpung Shamu Shamawt Wa Pru Wa Ai Hpe KIA Hkap Gap Gasat

Waimaw Kanpaiti lam Tangbau mare hte Hka Shi mare makau ni hta Myen hpyen dap hte KIA dap lapran dai hpawt manap jau gap hkat wa ai lam chye lu ai.

Dai hpawt manap hkying 5 daram ten kaw na, Waimaw Tangbau mare de hpyen shamu shamawt sa wa ai Myen hpyen hpung hpe KIA dap maga hkap shingla gasat ai kaw na ang katut jahkring gap gasat hkat wa ai nga, shawng lam magam gun ni tsun ai re.

“Waimaw kaw na pru wa ai Myen hpyen hpung ni hpe anhte maga na hkap gasat dat ai, dai kaw jahkring gap gasat hkat wa ai, dai hpang kaw na gaw, Myen ni shani ting laknak kaba gap shadam ai, dai na maga de nbungli hte mung bai sa gap ai,” nga tsun dai ai re.

Dai na maga hkying 2 chyen daram hta mung Myen hpyen Jet Fighter nbungli hte Hka Shi mare makau grup yin ni hta sa gap bun wa ai re.

Waimaw makau grup yin ni hta Myen  hpyen dap hpyen n gun kaba jahkrat da ai rai nna, dai kaw na pru wa ai Myen hpyen hpung ni hpe Hka Shi hte Tangbau mare maga de pru wa ai hpung ni hpe KIA hkap gasat wa ai rai nga ai.

Lai wa sai June praw 8 ya shani hta mung Myen hpyen dap gap dat ai laknak kaba si Hkat Cho mare na hpungkyi jawng langai hta wa hkrat ang ai rai tim, kapaw ai lam n nga ai majaw, mung shawa hkra hkala ai lam n nga ai re.

Dai wa hkrat ai hta, Hpungkyi jawng kaw wa hkrat ai laknak kaba lahkawng gaw n kapaw nna, hpungkyi jawng lahta mung shawa nta wa hkrat kapaw ai hta, dum nta hte mawdaw hkra hten ai lam nga ai nga, dai ginra na mung shawa ni tsun ai re.

Ya laknak kaba si wa hkrat ai shara ni hta, mung mare masha ni nga ai shara rai nna, Myen hpyen dap maga na ya na zawn laknak kaba wa hkrat ai majaw, dai mung shawa yawng hpe laga shara de bai htawt sit da ai lam chye lu ai.

Ndai laman Waimaw mare kaba hta Majan gap gasat ai lam n nga ai rai tim, Myen hpyen dap maga na gaw, shana shagu laknak kaba gap shadam bun taw nga ai re.