Myitkyina Bala Minhtin Mahkrai hta dung ai Myen Hpyen dap ni hpe KIA hte KPDF dap ni kaw na, Mana lana mi laman lahkawng lang sa gap gasat wa ai lam chye lu ai.
April 11 ya shana hkying 8 daram hta laknak kaba hte shawng sa gap bun wa ai hpang, lahkawng maga aten gadun gap gasat hkat wa ai lam nga ai hpe chye lu ai.
“Hkying 8 daram hta laknak kaba shawng ngoi ai, dai hpang sinat kaji ni mung bai ngoi ai, hkying hkum mi daram zim mat nna, hkying 10 daram hta kalang bai ngoi wa ai, Balaminhtin mahkrai hpe sa gap sam ai,” nga tsun dan ai re.
Dai hpang hkying 10 daram ten hta mung laknak kaba n sen kalang bai ngoi wa ai nga Myitkyina mung mare masha ni tsun ai re.
Ya na zawn gap gasat hkat wa ai hta, lahkawng maga hkra machyi ai lam nga n nga hpe a tsawm tup hkrak n chye lu ai re.
Myitkyina Bala Minhtin Mahkrai hta dung ai Myen hpyen dap ni gaw, hkawm sa hkawm wa mung mare masha ni hpe laja lana san jep ai lam galaw nna, ladu lai gumhpraw hta sha taw shara mung rai nga ai.
Ya ten Waimaw mayan hta Myen hpyen dap hte KIA dap lapran hpyen masa shaja hkat taw nga ai ten, Myitkyina Mali hka mahkrai kaba hpe sa gap gasat wa ai mung rai nga ai.
