Myen Miwa hpaga gunrai ginlen dabang kaba langai rai nga ai, Loi Je gunrai ginlen chying hka kaba hpe April 11 ya jahpawt hkying 7 chyen kaw na bai hpaw dat sai re lam, Loi Je ginra masha ni kaw na chye lu ai.
Myitkyina Manmaw lam kaba ntsa majan gap gasat hkat wa ai kaw na, Loi Je gun rai ginlen chyinghka kaba hpe pat kau ai gaw, April 11 ya jahpawt she bai hpaw ai nga Loi Je mare na mung mare masha langai KNG shiga dap de tsun dan ai re.
“Mani hpawt kaw na gunrai htaw chyinghka lam kaba gaw hpaw sai, Mawdaw ni mung pru shang taw sai, masha chyawm gaw n mai lai shi ai,” nga tsun ai re.
Majan ten laman hta, Nmawk hte Loi Je lapran pat hkrum taw ai gunrai htaw mawdaw kaba, tsa lam hpe, bai hpaw dat ya ai rai nga ai.
Ya ten masha pru shang ai lam gaw, ahkang rai n jaw da shi ai rai tim, shawoi na zawn gun rai htaw mawdaw ni pru shang taw sai nga tsun dan ai re.
Loi Je mare kaba hpe Wunpawng Mungdan Shanglawt Hpyen dap KIA kaw na April praw 9 ya shani yawng zep zi zing madu kau ai hpang, dai ginra hta KIO Uphkang Sai Ru jahkrat da sai re.
April 11 ya jahpawt tsi rung kaba hpaw akyu hpyi lamang galaw nna, dai hpawt manap hta mung Loi Je mare uphkang rung kaba hpaw akyu hpyi dawng hkawn sharawt ai lamang hpe galaw wa ai lam ndai zawn matut tsun dan ai re.
“Mani hpawt gaw Mung Shawa tsi rung hpaw akyu hpyi lamang galaw ai, dai hpawt gaw Uphkang rung hpaw dawng hkawn sharawt akyu hpyi hpawng galaw ai,” nga matut tsun dan wa ai re.
Ya ten Loi Je mare na hpaga gun rai ginlen dabang kaba hpe KIO kaw yu reng taw sai rai nga ai.
