Manmaw mare kaba hta Majan kaba byin wa na masa nga ai majaw, mare kaba na mung shawa ni hprawng yen law taw nga nna, Mawdaw shabrai hte nbungli manu ni htam hte htam manu tsaw rawt taw nga ai lam ginra masha ni tsun ai re.
KIA Ginjaw ginra mayan na Myen hpyen dap shara ma hkra hpe htim shagrawt gasat ngut ai hpang, Nmawk, Manmaw mare kaba ni de majan man bai yawng wa ai majaw, mung mare masha hprawng yen ai ni law wa ai rai nga ai.
Ya na zawn Mung mare masha ni myo mare kata na hprawng pru law taw ai majaw, mawdaw shabrai hte nbungli manu ni tsaw rawt taw nga ai re nga, Manmaw ginra masha langai KNG shiga dap de tsun dan wa ai re.
“Madung gaw Nbungli, Mawdaw lekmat dut ai ni hta madung ai, shawoi nga yang Manmaw hte Manmdalay Mawdaw shabrai 30,000 sha nga ai, rai tim ya gaw shara hte shara n bung ai, nkau kaw sen mi, nkau kaw sen mi jan dai hku nga ai, ngut na Manmaw mare kaw gaw sau ni ma ra ai daram n lu mari lang sai,” nga tsun dan ai re.
Shawoi Manmaw hte Mandalay lapran mawdaw shabrai Mun 3 sha nga ai rai tim, ya tenn hta Sen mi hkawt du nga sai lam matut tsun dan wa ai re.
Ya na zawn mawdaw shabrai ni tsawt rawt wa ai gaw, mung masa n pyaw ai hte, jak sau manu ni laja wa ai majaw mai byin ai rai tim, n kau ding gyeng bungli lam a majaw, manu grau tsaw rawt mat ai re lam chye lu ai.
Ya ten Manmaw kaw na Mandalay Mawdaw shabrai Sen mi, nbungli lekmat 265,000, Manmaw hte Yangon nbungli Sen 4, Manmaw Myitkyina nbungli 220,000 manu nga ai lam chye lu ai.
Ndai ten Manmaw Myitkyina Mawdaw lam kaba n hkrang ai majaw, Hti Chyik lam hku na gayin hkawm ra ai zawn, Manmaw Mandalay lam kaba lapran hta mung shagyit nau law ai majaw, jaw ra ai lam ni mung law taw ai lam tsun ai re.
Mung mare masha law malawng mung, ya ten na mung masa lam a majaw, nbungli hte sha madung hkrun lam hkawm sa taw nga ai re.
Ndai laman Manmaw muklum kata na Ja Seng, gunrai hkum sum hpa seng, hte Store seng kaba law malawng hpe pat da ai rai nna, gunrai shang ai lam ni mung n nga mat sai nga tsun ai re.
Ya ten Manmaw mare kaba hta nga ai mung shawa law malawng gaw, hprawng yen na shara n mu tinang nga ai shara hta ga n hkun gaduk htu na mai byin ai hku nga taw ai ni mung law law re lam da ginra na mung shawa ni tsun ai re.
