Loi Je Myen hpyen dap kata na, Myen Gumhpraw lap Sen Mun 6 jan hte ja rai n kau hpe zing madu la lu ai lam ginra masha ni kaw na chye lu ai.
Loi Je mare hta naw rawng taw ai Myen hpyen hpung ni gaw, April praw 8 ya shana hkying 10 daram hta Miwa hkran maga hku hprawng pru mat ai hpang, dai dap shara hpe KIA jasan ai ten, zing madu la lu wa ai re nga ginra masha langai KNG de ndai zawn tsun dan wa ai re.
“Asuya gumhpraw ni rai nga ai, dai kaw gaw jarit hpaga lam kaba re nga yang, gunrai htaw ginlen ai kaw na hta la lu ai hkawn kang gumhpraw ni rai na re ngu maram lu ai, Majan byin wa ai hte rau gaw Myen hpyen dap kata kaw shim na re nga na wa tawn da ai rai na re ngu maram lu ai,” nga tsun ai re.
Ya zing madu la lu ai gumhpraw ni yawng hpe KIA Asuya gumhpraw hku jai lang akyu jashawn mat wa na re lam chye lu ai.
Loi Je mare kata nga ai Myen hpyen asuya magam gun ni yawng gaw, Yaw Yung Bum Myen hpyen dap hpe htim gasat zing madu kau ai hpang, shan hte chye ai ladat hte yawng hprawng pru ma sai re.
Dai hpang Balik hpyen la ni mung, Myen hpyen dap de sa pawng gahkyin nga mat ai hpang, Balik dap hpe KIA dap maga shara sa jasan ai lam ni galaw wa ai rai nga ai.
April praw 4 ya shani hta gaw KIA dap maga de na Loi Je mare kata na လဝက, Tsi Rung, Uphkang rung ni hkan na Myen dawng hkawn yawng hpe hkan shayu kau ya nna, asuya hte seng ai rung wang yawng hpe hkan pat wa ai re.
Myen hpyen asuya shara ni hpe gau ngwi ngwi hkan pat kau ngut ai hpang, Myen hpyen dap hpe April praw 9 ya shani hpang jahtum pru mat wa na matu tsun sadi jaw da ai re.
Ya na zawn Myen hpyen dap hpe tsun sadi jaw wa ai hpang, Myen hpyen dap ni yawng April praw 8 ya shana pru mat wa ai rai nga ai.
Loi Je mare kaba yawng hpe sinat mahku n shangoi ai sha, yawng zep zi zing madu kau lu ai sai rai nna, dai ginra hta KIO Uphkang Sai Ru ni hpe jahkrat hpang wa nga sai lam ginra masha ni tsun ai re.
Ya ten Loi Je mare kata hta mung shawa yawng shawoi na zawn dut lu dut sha galaw nga sai rai tim, Miwa asuya maga de na Mungdan Chyinghka hpaw ya ai lam rai n nga shi ai re.